Թուրքիայի նորանշանակ ԱԳ նախարարն Իրանում ուշադրության կենտրոնում է․ անդրադարձ

Իրանում շարունակվում են շահարկումները՝ կապված հարևան երկրների նկատմամբ Թուրքիայի նոր քաղաքականության հետ՝ նախագահ Ռեջեփ Թայիփ Էրդողանի վերընտրվելուց մեկ ամիս անց, ասվում է Middle East Eye-ի անդրադարձում։

Նշվում է, որ անցյալ շաբաթ իրանական մեդիան ավելի շատ կենտրոնացած էր Թուրքիայի նորանշանակ ԱԳ նախարար  Հաքան Ֆիդանի և վերջին տարիներին Անկարայի արտաքին քաղաքականության ձևավորման գործում նրա դերի ուղղությամբ: Մինչ այս պաշտոնում նշանակվելը՝ նա 13 տարի աշխատել է որպես Թուրքիայի Ազգային հետախուզական կազմակերպության տնօրեն։

Մասնավորապես, Afsaran_ir տելեգրամ ալիքը, որը մոտ է Իսլամական հեղափոխության պահապանների կորպուսին (IRGC), ողջունել է Թուրքիայում նոր նշանակումը՝ ընդգծելով Ֆիդանի հակաիսրայելական քաղաքականությունը: Տելեգրամ-ալիքը պնդում է, որ Ֆիդանը սերտ կապեր է հաստատել Իսլամական հեղափոխության պահապանների կորպուսի հետ այն բանից հետո, երբ իսրայելական ուժերը գրոհել են Գազայի ազատության նավատորմը 2010 թվականին:

Այլ վերլուծաբաններ էլ ընդգծում են Ֆիդանի դերը Թուրքիայի կողմից հյուսիսային Սիրիայի որոշ մասերի բռնակցման գործում։

«Iranian Diplomacy» կայքի սյունակագիր Իսլամ Զոլքադրփուրը զգուշացրել է իրանցի պաշտոնյաներին, որոնք հավատում են «Իրանի հետ Ֆիդանի դաշինքին»։

«2010-ից մինչև 2020 թվականները Ֆիդանի ղեկավարությամբ Թուրքիան կիրառել է անվտանգության և հետախուզական ռազմավարություններ, որոնք հակասում էին տարածաշրջանում Իրանի շահերին»,- գրել է հոդվածագիրը։

Նա նշել է, որ «Թուրքիայի ազգային հետախուզական կազմակերպությունը Սիրիայի հյուսիսում ահաբեկչական և ռազմատենչ կազմակերպությունների գլխավոր հովանավորն է, իսկ Հաքան Ֆիդանը նրանց քաղաքականությունը կազմակերպող գլխավոր գործիչն է»։

Էմմա Չոբանյան