07.10.2026 | 23:48
Արթուր Դանիելյանը կալանավորվեց
Ուկրաինայում «Բայրաքթար» անօդաչուներ կարտադրեն
Քաղաքականություն
23.06.2023 | 16:43
Baykar ընկերությունը լիցենզիա է ստացել Ուկրաինայում ԱԹՍ-ներ արտադրելու համար։ Ըստ Baykar-ի գլխավոր տնօրեն Հալուք Բայրաքթարի՝ թուրքական իշխանությունների կողմից տրված լիցենզիան նախատեսում է երկու տեսակի մարտական հարվածային անօդաչու թռչող սարքերի՝ Bayraktar TB2-ի և Bayraktar Akinci-ի արտադրության ամբողջական ցիկլ։ Վերջինը թուրքական ռազմարդյունաբերական համալիրի նորագույն մշակումն է, որի զանգվածային արտադրությունը մեկնարկել է 2022 թվականին, գրում է BBC-ի ռուսական ծառայությունը։
Ընկերությունն ակնկալում է Ուկրաինայում արտադրություն բացել 2025 թվականին։ Ձեռնարկությունում նախատեսված ներդրումների ընդհանուր ծավալը կազմում է 95,5 մլն դոլար։
2019 թվականին Բայքարն Ուկրաինայում հիմնել է «Avia Ventures» ՍՊԸ-ն։ Սպասվում է, որ հենց այս ձեռնարկությունը «Բայքարի» անունից կզբաղվի հարվածային անօդաչու թռչող սարքերի արտադրության գործարանի կառուցմամբ։
2022 թվականի փետրվարին Ուկրաինայի և Թուրքիայի կառավարությունների միջև ստորագրվել է ավիատիեզերական արդյունաբերության ոլորտում համագործակցության համաձայնագիր։ Ուկրաինայի պաշտպանության նախարար Ալեքսեյ Ռեզնիկովի խոսքով՝ ուկրաինական արտադրության անօդաչու սարքերը կհամալրվեն ուկրաինական արտադրության շարժիչներով։
Նախատեսվում է ստեղծել նաև «Բայրաքթար» տարբեր կատեգորիաների անօդաչու թռչող սարքերի կառավարման մասնագետների պատրաստման ուսումնական կենտրոն։
Տաթև Ֆռանգյան
