14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Բայդենն ու Մոդին հանդես են եկել Ուկրաինայի տարածքային ամբողջականության պաշտպանության օգտին
Քաղաքականություն
23.06.2023 | 13:54
ԱՄՆ նախագահ Ջո Բայդենն ու Հնդկաստանի վարչապետ Նարենդրա Մոդին հանդես են եկել Ուկրաինայի տարածքային ամբողջականության պաշտպանության օգտին՝ խորը մտահոգություն հայտնելով զինված հակամարտության և դրա «սարսափելի ու ողբերգական հումանիտար հետևանքների» վերաբերյալ, գրում է DW-ի ռուսական ծառայությունը։
Հունիսի 22-ի հանդիպման արդյունքներով հրապարակված համատեղ հայտարարության մեջ նրանք կոչ են անում «հարգել միջազգային իրավունքը, ՄԱԿ-ի կանոնադրության սկզբունքները, ինչպես նաև տարածքային ամբողջակությունն ու ինքնիշխանությունը»։
«Առաջնորդներն ընդգծել են պատերազմի լուրջ և աճող ազդեցությունը համաշխարհային տնտեսական համակարգի, այդ թվում՝ սննդի, էներգետիկ անվտանգության և մատակարարման կարևոր շղթաների վրա: Նրանք կոչ են արել ակտիվացնել ջանքերը պատերազմի հետևանքները մեղմելու համար, հատկապես զարգացող երկրներում»,- ասվում է փաստաթղթում։
Նշվում է նաև, որ երկու երկրները պարտավորվում են շարունակել Ուկրաինային հումանիտար օգնությունը։
Սպիտակ տանը Ջո Բայդենի հետ համատեղ ասուլիսում Նարենդրա Մոդին նաև խոստացել է ձգտել խաղաղություն հասնել Ուկրաինայում։
«Ուկրաինայում իրադարձությունների ամենասկզբից Հնդկաստանը շեշտը դրել է վեճերի լուծման, երկխոսության և դիվանագիտության վրա։ Մենք լիովին պատրաստ ենք ցանկացած ներդրում ունենալ խաղաղության վերականգնման գործում»,- ասել է նա։
Հավելենք, որ Մոդին հունիսի 20-ին պետական այցով ժամանել է ԱՄՆ։ Նյու Յորքում նա այցելել է ՄԱԿ-ի կենտրոնակայան, որից հետո ուղևորվել Վաշինգտոն՝ Ջո Բայդենի և այլ պաշտոնյաների հետ բանակցությունների։
Էմմա Չոբանյան
