ՀՀ ՆԳ նախարարը և Կանզասի նահանգապետը քննարկել են թմրաշրջանառության դեմ պայքարի ուղղությամբ ոստիկանության աշխատանքները

ՀՀ ՆԳ նախարար Վահե Ղազարյանը հունիսի 22-ին ընդունել է ԱՄՆ Կանզասի նահանգապետ Լորա Քելլիին։ Այդ մասին հայտնում են ՀՀ ՆԳՆ-ից:

Վահե Ղազարյանը բարձր է գնահատել երկու երկրների միջև ձևավորված բարեկամական հարաբերությունները, որոնք 30 տարվա պատմություն ունեն և հիմնվում են ժողովրդավարության, մարդու իրավունքների և իրավունքի գերակայության ընդհանուր արժեքների վրա։

Վահե Ղազարյանը կարևորել է ԱՄՆ նահանգային համագործակցության ծրագրի շրջանակներում դեռևս 2003 թվականից Կանզաս նահանգի ազգային գվարդիայի հետ համագործակցությունը:

Նա հանգամանորեն ներկայացրել է նաև ներքին գործերի նախարարությունում ընթացող բարեփոխումները։

Լորա Քելլին բարձր է գնահատել արդեն իսկ ձևավորված համագործակցությունը, ողջունել իրականացվող բարեփոխումները և փորձի փոխանակման պատրաստակամություն հայտնել։

Կողմերը քննարկել են թմրաշրջանառության դեմ պայքարի և ապօրինի պահվող զենք-զինամթերքի կամավոր հանձնման ուղղությամբ ոստիկանության աշխատանքները։

Անդրադարձ է եղել նաև ՆԳՆ փրկարար ծառայության աշխատանքներին:

Փրկարար ծառայության տնօրեն-ՆԳ նախարարի տեղակալ Կամո Ցուցուլյանը ներկայացրել է ծառայության գործառույթներն ու կառուցվածքը։

ՆԳՆ փոխնախարար Արփինե Սարգսյանն անդրադարձել է աղետների ռիսկերի կառավարման թեմային:

Խոսել է աղետների վաղ ազդարարման, արագ արձագանքման, աղետների հետևանքների վերացման և, ընդհանուր առմամբ, աղետների ռիսկի ողջ ցիկլի կառավարման խնդիրներից:

Նշել է նաև, որ այդ ուղղությամբ քննարկումներ են եղել USAID-ի հետ, ինչի արդյունքում նախագիծ է ներկայացվել ՀՀ կառավարություն:

Քննարկվել են նաև փոխադարձ հետաքրքրություն ներկայացնող այլ հարցեր:

Հանդիպման ավարտին կողմերը պատրաստակամություն են հայտնել շարունակել և ամրապնդել երկկողմ արդյունավետ համագործակցությունը։