Ինչ ունեցվածք է հայտարարագրել ՊԵԿ նախագահի տեղակալ Արտյոմ Սմբատյանը

Պետական եկամուտների կոմիտեի նախագահի առաջին տեղակալ Արտյոմ Սմբատյանն անցած տարի բնակարան է գնել Ծիծեռնակաբերդի խճուղում կառուցվող շենքերից մեկում։ Այս մասին տեղեկանում ենք Կոռուպցիայի կանխարգելման հանձնաժողովին ներկայացված 2022 թ-ի գույքի, եկամուտների, ծախսերի և շահերի հայտարարագրից։ Ընդհանուր 102.6 քմ մակերեսով բնակարանի գնման իրավունքի համար Սմբատյանը կառուցապատողին՝ «Սահակյանշին» ՓԲԸ-ին, որպես փոխառություն վճարել է 31․2 մլն դրամ։

Սմբատյանը վարկի մեծությունը ստացված եկամուտների մեջ չի արտացոլել։ Չի նշել նաև վարկի մարմանն ուղղված վճարումների չափ։ Միայն նշել է տարեվերջին վարկի մայր գումարի մնացորդը՝ 20․3 մլն դրամ։

Այլ անշարժ գույք Արտյոմ Սմբատյանը չունի, տարվա ընթացքում 90 օրից ավելի փաստացի տիրապետել է Երևանի Կենտրոնում բնակարանի։

ՊԵԿ փոխնախագահը 2020թ-ին գնել է 2016թ-ի արտադրության MERCEDES-BENZ մակնիշի ավտոմեքենա։

Նրա բանկային միջոցները տարեսկզբին 0 դրամից տարեվերջին դարձել են 20 մլն դրամ։ Որպես կանխիկ գումար Սմբատյանը հայտարարագրել է 670 հազար դրամ։

Պաշտոնյայի տարեկան եկամուտը կազմել է 19․4 մլն դրամ, որից գրեթե 19 մլն դրամը ՊԵԿ-ից ստացած աշխատավարձն է, իսկ 446 հազար դրամը՝ ֆինանսների նախարարությունից ստացած հիփոթեքային վարկի եկամտահարկի վերադարձ է։

Հանգստի համար ՊԵԿ փոխնախագահն անցած տարի ծախսել է 6․6 մլն դրամ։

Արտյոմ Սմբատյանը «Քաղաքացիական պայմանագիր» կուսակցության անդամ է։

Գայանե Խաչատրյան