08.04.2026 | 15:20
Ալիևը Ղազախստանի նախարարների հետ Հայաստան-Ադրբեջան կարգավորումն ու TRIPP-ն է քննարկել
Turkish Airlines-ն աշխատանքից հեռացրել է օդաչուին՝ ընդդիմությանն աջակցող գրառումը հավանելու համար
Քաղաքականություն
21.06.2023 | 23:00
Թուրքիայի ազգային ավիափոխադրող Turkish Airlines ավիաընկերությունն աշխատանքից հեռացրել է օդաչու Էվրեն Կապթանին՝ պատճառաբանելով, որ նա հավանել և տարածել է գլխավոր ընդդիմադիր Ժողովրդահանրապետական կուսակցության առաջնորդ Քեմալ Քըլըչդարօղլուին և նույն կուսակցությունից Ստամբուլի քաղաքապետ Էքրեմ Իմամօղլուին աջակցող թվիթերյան գրառումները, գրում է Duvar-ը։
Ընտրություններից հետո նրան հեռացրել են աշխատանքից։ Այժմ օդաչուն դատական գործընթաց է սկսում։
«Թուրքական ավիաուղիների խորհրդի նախագահ Ահմեթ Բոլաթը գործադիր խորհրդի օգնությամբ աշխատանքից ազատել է օդաչուին, որը հավանել և կիսվել է Քեմալ Քըլըչդարօղլուի և Էքրեմ Իմամօղլուի թվիթերով։ Սա նշանակում է, որ ոչ ոք չի կարող աշխատել ընկերությունում, բացի AKP-ի (Արդարություն և զարգացում կուսակցություն) անդամներից»,- սոցցանցի իր էջում գրել է Airport Haber-ի սեփականատեր և ընդդիմադիր «Լավ» (İYİ) կուսակցության Ստամբուլի նահանգային մասնաճյուղի հիմնադիր խորհրդի անդամ Ալի Քըդըքը։
Հիշեցնենք, որ 2023 թվականի նախագահական ընտրություններում Քըլըչդարօղլուն Ռեջեփ Թայիփ Էրդողանի հիմնական մրցակիցն էր։
Էմմա Չոբանյան
