08.10.2026 | 14:42
ՄԻՊ-ը Վարդենիսի խնամքի կենտրոնում աշխատանքի շահագործման և այլ խախտումներ է արձանագրել
Լավրովը հայտարարել է, թե Արևմուտքն «անկեղծ ցանկություն չունի» օգնելու Երևանին ու Բաքվին խաղաղության գործընթացում
Քաղաքականություն
20.06.2023 | 17:08
Բաքուն և Երևանը հասկանում են, որ Արևմուտքն «անկեղծ ցանկություն չունի» օգնելու իրենց հարաբերությունների խաղաղ կարգավորմանը։ Այս մասին հայտարարել է ՌԴ ԱԳ նախարար Սերգեյ Լավրովը, փոխանցում է ՏԱՍՍ-ը։
«Ցավոք, այն, ինչ անում են հիմա ԱՄՆ-ն ու ԵՄ-ն, մենք ավելի շատ դիտարկում ենք ոչ թե պայմանավորվելուն օգնելու ցանկություն, այլ ցանկություն՝ թափանցել տարածաշրջան, Ռուսաստանի Դաշնության օրինական շահերի վրա ճնշում գործադրելու ցանկություն և որպես ինչ-որ ուժ հաստատվելու ցանկություն, որն այստեղ գրեթե որոշիչ դեր կխաղա»,- ՀԱՊԿ անդամ երկրների ԱԳ նախարարների խորհրդի նիստից հետո լրագրողների հետ զրույցում ասել է Լավրովը։
Նրա կարծիքով՝ Արևմուտքի նման գործողություններն արտացոլում են նրա ցանկությունը՝ «ընդլայնվել դեպի տարածաշրջաններ, որոնք հեռու են ՆԱՏՕ-ի և ԵՄ անդամ երկրների սահմաններից, և դա քիչ կապ ունի իրավիճակի կայունացմանն օգնելու անկեղծ ցանկության հետ»:
«Մեր գործընկերները Երևանում ու Բաքվում, հուսով եմ, դա հասկանում են։ Համենայնդեպս, մենք անկեղծորեն քննարկում ենք նրանց հետ կատարվողը»,- ասել է Լավրովը։
Նա նաև նշել է, որ Ռուսաստանի Դաշնությունը դեմ չէ, որ միջազգային խաղացողները Բաքվի և Երևանի միջև որպես միջնորդ հանդես գան:
«Մենք դեմ չենք, որ միջազգային այլ խաղացողներն իրենց ուժերը փորձեն միջնորդի դերում»,- հայտարարել է ՌԴ ԱԳ նախարարը։
Էմմա Չոբանյան
