Բայրամովը կրկին «Զանգեզուրի միջանցքից» է խոսել՝ ՀՀ-ին մեղադրելով «հաղորդակցությունների ապաշրջափակման հարցում դժվարություններ ստեղծելու» մեջ

Աշխատանքային այցով Մեծ Բրիտանիայում գտնվող Ադրբեջանի ԱԳ նախարար Ջեյհուն Բայրամովը ելույթ է ունեցել Caspian Connection Conference-ում, որը կազմակերպել է Բաքվի կողմից ստեղծված և ֆինանսավորվող Կասպիական քաղաքական կենտրոնը։

Բայրամովը խոսել է բացառիկ աշխարհագրական դիրք ունեցող Կասպից ծովի ստեղծած հնարավորությունների մասին, նաև անդրադարձել Հայաստանի հետ հարաբերություններին։ Նա նշել է, որ Ադրբեջանի և Հայաստանի միջև հարաբերությունների կարգավորման հեռանկարներ են բացվել՝ «ինքնիշխանության, տարածքային ամբողջականության և սահմանների անձեռնմխելիության փոխադարձ հարգանքի հիման վրա»։

Բայրամովի խոսքով՝ «Ադրբեջանը վճռական է՝ շարունակել ընթանալ զարգացման ճանապարհով, որը նպաստում է տարածաշրջանի համար ավելի ապահով և բարեկեցիկ ապագայի կերտմանը, և շահագրգռված է համագործակցել տարածաշրջանից և նրա սահմաններից դուրս ներդրողների հետ»։

Ադրբեջանի ԱԳ նախարարը հերթական անգամ հանդես է եկել «միջանցքի» վերաբերյալ հայտարարությամբ։ Մասնավորապես, նա նշել է, որ «2022 թվականին Ադրբեջանի տարածքով տարանցումն աճել է 75%-ով, և վստահություն հայտնել, որ բոլոր հաղորդակցությունների բացումը կնպաստի տարածաշրջանում հետագա կայուն խաղաղությանն ու կայունությանը, էապես կբարձրացնի առևտուրն ու տրանսպորտը»։ Այս համատեքստում ադրբեջանցի պաշտոնյան խոսել է, այսպես կոչված, «Զանգեզուրի միջանցքի» կարևորության մասին, որը «Միջին միջանցքի շրջանակում հաղորդակցությունների հետագա ընդլայնման ներուժ ունի»։

Ի դեպ, Բայրամովը հերթական անգամ անհիմն մեղադրանքներ է հնչեցրել Հայաստանի հասցեին՝ նշելով, թե չնայած գործադրված ջանքերին, հայկական կողմը, իբր, «դժվարություններ է ստեղծում հաղորդակցությունների ապաշրջափակման հարցում»։

Էմմա Չոբանյան