15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Ամերիկյան General Electric-ը դադարեցրել է ՌԴ-ում ՋԷԿ-երի տուրբինների սպասարկումը
Քաղաքականություն
20.06.2023 | 14:56
Ամերիկյան General Electric ընկերությունը պատժամիջոցների պատճառով դադարեցրել է ռուսական ՋԷԿ-երում տեղադրված իր արտադրած գազատուրբինների սպասարկումը։ Այս մասին հայտնում է Կոմերսանտը, գրում է Meduza-ն։
Նրանց խոսքով՝ ընկերությունը փակել է ՌԴ-ից մուտքը դեպի տուրբինների շահագործման մոնիթորինգի համակարգ։ Լրատվամիջոցի զրուցակիցները նշել են, որ հաջորդ փուլում կդադարեցվեն GE տուրբինների և նրան պատկանող Alstom-ի օրիգինալ պահեստամասերի մատակարարումը։
Նշվում է, որ ընկերությունը դադարեցրել է գազային տուրբինների սպասարկումը ԱՄՆ պատժամիջոցների նոր փաթեթի ուժի մեջ մտնելուց հետո, որն արգելում էր ամերիկյան ընկերություններին ինժեներական ծառայություններ մատուցել Ռուսաստանում որևէ մեկին։ Բաղադրիչների վերանորոգումն ու փոփոխումը շատ ավելի կարևոր են Ռուսաստանի ՋԷԿ-ում տեղադրված հզոր տուրբինների համար։
«Արևմտյան գործընկերների կողմից համագործակցության լիովին դադարեցումը սպասելի էր։ Ընկերությունը դեռ ունի անհրաժեշտ պահեստամասեր, սակայն դիտարկում է արտադրության ու սպասարկման տեղայնացման հնարավորությունը»,-ասել են «Т Плюс» ընկերությունից։
Նշվում է,որ Ռուսաստանում տարբեր ապրանքանիշերի ներմուծված տուրբիններով էներգաբլոկների հզորությունը գնահատվում է 25 ԳՎտ, իսկ դրանց արտադրանքի բաժինը երկրում կազմում է 17 տոկոս։
ԱՄՆ-ն ու ԵՄ-ն դեռևս պատժամիջոցներ չեն սահմանել, որոնք ուղղակիորեն արգելում են ՌԴ գազային տուրբինների բաղադրիչների մատակարարումը։
Էմմա Չոբանյան
