04.11.2024 | 22:14
Ադրբեջանը 4,7 մլն դոլար է վճարել լոբբիստներին՝ COP29-ից առաջ իր «ավտորիտար իմիջը մաքրելու» համար․ Democracy for Sale
Մակրոնը հայտարարել է, որ Եվրոպային անհրաժեշտ է սեփական հակաօդային պաշտպանությունը՝ ԱՄՆ-ից չափազանց մեծ կախվածությունից խուսափելու համար
Քաղաքականություն
20.06.2023 | 15:30
Ֆրանսիայի նախագահ Էմանուել Մակրոնը կոչ է արել եվրոպական երկրներին ավելի մեծ անկախության ձգտել օդային տարածքի պաշտպանության հարցում՝ ԱՄՆ-ից չափազանց մեծ կախվածությունից խուսափելու համար, գրում է Euronews-ը։
Մակրոնը Փարիզում տեղի ունեցած համաժողովում ունեցած ելույթում հանդես է եկել օդային պաշտպանության սեփական ռազմավարության մշակման օգտին։
«Մենք պետք է իմանանք, թե ինչպիսին է սպառնալիքի հետ կապված իրավիճակը։ Եվ հետո, մենք՝ եվրոպացիներս, ի՞նչ կարող ենք արտադրել: Իսկ հետո՝ ի՞նչ է մեզ պետք գնել»,- ասել է Մակրոնը։
Նա նաև զգուշացրել է՝ անհապաղ չգնել «դարակներում եղածը»։
Քննարկումները կենտրոնացել են անօդաչու թռչող սարքերի դեմ պայքարի և բալիստիկ հրթիռների դեմ պաշտպանության ուղղությամբ, ասել են համաժողովի ֆրանսիացի կազմակերպիչները՝ նշելով, որ Մոսկվայի լայնամասշտաբ ներխուժումն Ուկրաինա ցույց է տվել նման տեխնիկայի կարևորությունն ու արդյունավետությունը։ Օրակարգում է եղել նաև միջուկային զենքի զսպման հարցը։
Հանդիպմանը մասնակցել են դիվանագետներ Գերմանիայից, Մեծ Բրիտանիայից, Շվեդիայից, Լեհաստանից, Սլովակիայից, Հունգարիայից և Ռումինիայից, ինչպես նաև ՆԱՏՕ-ի ու ԵՄ-ի ներկայացուցիչներ։
Մակրոնը պնդել է, որ եվրոպական պաշտպանական արտադրողները կառուցեն անկախ ռազմական համակարգեր և տեղափոխեն արտադրությունը մայրցամաք։ Նա նշել է, որ ԱՄՆ-ի ստանդարտացումը հանգեցրել է եվրոպական կախվածությանը։
«Ամերիկացիները շատ ավելին են ստանդարտացրել, քան մենք, և նրանք իրենք ունեն դաշնային գործակալություններ, որոնք հսկայական սուբսիդիաներ են տրամադրում իրենց արտադրողներին»,- ասել է Մակրոնը։
Նա նաև հավելել է, որ Ֆրանսիայի և Իտալիայի կողմից մշակված Mamba հակահրթիռային համակարգն «այժմ տեղակայվել և գործում է Ուկրաինայում՝ պաշտպանելով հիմնական օբյեկտներն ու մարդկանց կյանքեր։
Էմմա Չոբանյան
