14.08.2026 | 17:01
Թվայնացումը՝ ՊԵԿ բարեփոխումների կարևոր բաղադրիչ․ խորհրդի նիստում քննարկվել են նոր նախաձեռնություններ
Բլինքենը հայտարարել է, որ Չինաստանը խոստացել է զենք չուղարկել Ռուսաստան
Քաղաքականություն
19.06.2023 | 18:24
ԱՄՆ պետքարտուղար Էնթոնի Բլինքենը Պեկինում հայտարարել է, որ Չինաստանը վերահաստատել է Ռուսաստանին զենք չուղարկելու խոստումները՝ Ուկրաինայում կռվելու համար։ Նա, միաժամանակ, մտահոգություն է հայտնել չինական մասնավոր ընկերությունների գործողությունների առնչությամբ, հայտնում է AFP-ն։
«Մենք և այլ երկրներ ստացել ենք Չինաստանից երաշխիքներ, որ չի տրամադրում և չի տրամադրի մահաբեր օգնություն Ռուսաստանին՝ Ուկրաինայում օգտագործելու համար։ Մենք դրան հակասող որևէ ապացույց չենք տեսել: Այնուամենայնիվ, մշտական մտահոգություններ ունենք չինական ընկերությունների մասով, որոնք կարող են տրամադրել տեխնոլոգիա, որը Ռուսաստանը կարող է օգտագործել Ուկրաինայում իր ագրեսիան առաջ մղելու համար։ Մենք խնդրել ենք Չինաստանի կառավարությանը՝ շատ զգոն լինել այդ հարցում»,- Պեկինում երկօրյա բանակցություններից հետո լրագրողներին ասել է Բլինքենը։
ԱՄՆ պետքարտուղարը նաև ասել է, որ Չինաստանը Ռուսաստանի մասով հավաստիացումներ տվել է վերջին շաբաթներին, այլ ոչ միայն իր այցի ընթացքում։
Չինաստանը վերջերս ուժեղացրել է իր դիվանագիտությունն Ուկրաինայի հարցում՝ մի քայլ, որը թերահավատորեն է ընդունվում ԱՄՆ-ի կողմից։
Հավելենք, որ Բլինքենը Պեկինում բանակցություններ է անցկացրել Չինաստանի նախագահի, ԱԳ նախարարի և այլ պաշտոնյաների հետ։
Էմմա Չոբանյան
