Ընկերությունը Երասխի գործարանի տարածքում կտեղադրի Հայաստանի և ԱՄՆ-ի դրոշները

«Ջի Թի Բի սթիլ» ՍՊ ընկերության հիմնադիրները որոշում են կայացրել Երասխ գյուղում կառուցվող երկաթի ձուլման գործարանի տարածքում տեղադրել Հայաստանի Հանրապետության և Ամերիկայի Միացյալ Նահանգների դրոշները․ Այս մասին հայտնում են ընկերությունից։

Դրոշների բարձրացման արարողությունը տեղի կունենա վաղը՝ հունիսի 20-ին։

Հիշեցնենք, որ հունիսի 14-ին, ՊՆ-ից հայտնել էին, որ ժամը 11:45-ի սահմաններում Երասխում կառուցվող մետալուրգիական գործարանի ուղղությամբ Ադրբեջանի սադրանքի հետևանքով վիրավորում է ստացել օտարերկրյա 2 քաղաքացի՝ գործարանի կառուցման շինարարական աշխատանքներում ներգրավված Հնդկաստանի քաղաքացիներ Մուհամադ Ասիֆը և Միրհասան Սահաջանը։ Ադրբեջանի կողմից ՀՀ Երասխ բնակավայրի ուղղությամբ քաղաքացիական նշանակության օբյեկտ հանդիսացող՝ կառուցվող մետալուրգիական գործարանի թիրախավորման հետևանքով վիրավորում ստացած երկու օտարերկրացի աշխատակիցներին վիրահատել են:

Ադրբեջանի ԶՈՒ-ի կողմից կրակոցները կառուցվող գործարանի ուղղությամբ չեն դադարել։ Այսօր ևս ՀՀ ՊՆ-ն նույնաբովանդակ հաղորդագրություն է տարածել։

Նշենք նաև, որ ԱՄՆ Պետքարտուղարության խոսնակ Մեթյու Միլլերը ճեպազրույցում անդրադարձել էր Երասխի ուղղությամբ ադրբեջանական սադրանքներին։

Լրագրողը հարց էր ուղղել Միլլերին Երասխում տեղի ունեցած միջադեպի վերաբերյալ նրա թվիթերյան գրառման առնչությամբ։ «Ես այլ բան չունեմ, չեմ կարող առաջարկել իրավիճակի վերաբերյալ, քան ասել, որ մենք մտահոգված ենք իրավիճակով։ Եվ մենք շարունակում ենք երկու կողմերին հորդորել աշխատել միասին՝ մնացյալ տարաձայնությունները հաղթահարելու։ Ընդհանուր առմամբ, ինչպես ասել ենք երեկ, հավատում ենք, որ համաձայնագիրը հասանելի է և հավատում ենք և դեռ անհամբեր սպասում ենք երկու կողմերին առաջ շաժվելու համար»,- ասել էր Միլլերը։