14.08.2026 | 15:58
Զելենսկին չի կարողանում ԱՄՆ-ում Ուկրաինայի նոր դեսպան գտնել․ Politico
Իսրայելական բանակը գործողություն է իրականացրել Ջենին քաղաքում. տուժածներ կան
Քաղաքականություն
19.06.2023 | 16:22
Իսրայելական ռազմական մեքենա է պայթել Հորդանան գետի արևմտյան ափում գործողության ընթացքում պայթուցիկ սարքի բախվելուց հետո: Այս մասին հայտնել է Իսրայելի պաշտպանության բանակի մամուլի ծառայությունը։
«Այսօր առավոտյան Իսրայելի պաշտպանության ուժերը և սահմանապահ ոստիկանությունը Ջենին քաղաքում երկու կասկածյալի ձերբակալելու գործողություն են իրականացրել։ Քաղաքից անվտանգության ուժերի հեռանալու ժամանակ ռազմական մեքենան բախվել է պայթուցիկ սարքի և վնասվել»,- ասվում է հայտարարության մեջ։
Իսրայելցի զինվորականների շրջանում զոհերի մասին տեղեկություններ չեն հաղորդվում։ Նշվում է, որ «ռազմական ուղղաթիռները կրակել են Ջենինի թաղամասերից մեկի վրա՝ այնտեղ զինված մարդկանց հայտնաբերելուց հետո»։
Reuters-ը հայտնում է, որ իսրայելցի զինվորականները Հորդանան գետի արևմտյան ափում գործողության ընթացքում սպանել են երեք պաղեստինցիների, այդ թվում՝ մեկ դեռահասի, վիրավորվել է առնվազն 29 մարդ։
Իսրայելն այս միջադեպն անվանել է «զանգվածային փոխհրաձգություն տեղի զինված բնակչության հետ, որոնք զինվորականների ուղղությամբ պայթուցիկներ են նետել»։
Պաղեստինի Առողջապահության նախարարությունն իր հերթին հայտնել է, որ առնվազն երեք մարդ է մահացել, ևս 31-ը՝ վիրավորվել Ջենինում իսրայելական ուժերի հետ բախումների ժամանակ։ Առնվազն վեց վիրավորի վիճակը գնահատվում է ծանր։
Տաթև Ֆռանգյան
