Իսրայելում ոչնչացրել են Բաքվում Ալիևի կողմից նախագահ Հերցոգին նվիրած միրգն ու բանջարեղենը

Իսրայելի Գյուղատնտեսության նախարարության տեսուչները ոչնչացրել են ավելի քան 10 արկղ միրգ ու բանջարեղեն, որն Ադրբեջանի նախագահ Իլհամ Ալիևի անունից Բաքու կատարած այցի ժամանակ որպես նախագահ Իսահակ Հերցոգին նվեր փոխանցել էին նրան ուղեկցող պատվիրակությանը։ Պաշտոնական պատճառը «երկրում գյուղատնտեսական վնասատուների հնարավոր ներթափանցման հետ կապված մտահոգություններն են», գրում է ադրբեջանական Թուրան գործակալությունը՝ վկայակոչելով vesty.co.il-ին։

Իսրայելի նախագահի և նրա տիկնոջ երկօրյա այցն Ադրբեջան տեղի է ունեցել մայիսի վերջին։ Նշվում է, որ իսրայելական պատվիրակության անդամները Բաքվում բազմաթիվ նվերներ են ստացել, այդ թվում՝ գորգեր, ձեռագործ սպասք և հուշանվերներ։ Սակայն ամենամեծ անակնկալը նրանց սպասել է ինքնաթիռում։ Աթոռներին իսրայելցիներն Ադրբեջանում աճեցվող մրգով ու բանջարեղենով արկղեր են գտել, այդ թվում՝ դեղձ, սալոր, խնձոր, կիտրոն, վարունգ, ինչպես նաև մուրաբաներ ու մեղր:

Դեռևս օդում Israir ընկերության ներկայացուցիչները հայտնել են, որ նվերների մասին պետք է զգուշացնել Գյուղատնտեսության նախարարության ներկայացուցիչներին։ Նախագահի աշխատակազմի հետ խորհրդակցելուց հետո որոշվել է ոչնչացնել ապրանքը՝ Իսրայելում ընդունված կանոնների համաձայն։

«Բեն Գուրիոն օդանավակայանում վայրէջք կատարելուց հետո նախագահական պատվիրակության ղեկավարը տեսուչներին զգուշացրել է օդանավում եղած մրգերի և բանջարեղենի մասին, ինչպես ցանկացած գյուղմթերքի դեպքում, որը նախնական ստուգում չի անցել։ Վնասատուների ներթափանցման մտավախությունների պատճառով որոշվել է ոչնչացնել բերված պտուղները։ Երկիր առանց նախնական ստուգման բանջարեղենի և մրգերի ներմուծումը կարող է մեծ վնաս հասցնել տեղի բուսական աշխարհին, ինչպես նաև հանգեցնել հիվանդությունների տարածման բնակչության, կենդանիների և բույսերի շրջանում»,- ասվում է Գյուղատնտեսության նախարարության հայտարարության մեջ։

Էմմա Չոբանյան