06.06.2026 | 11:56
Արամ Դանիելյանից կբռնագանձվեն բնակարաններ, հողամասեր, մեքենաներ և 100 մլն դրամ
Պուտինի ընկերոջ այցը Սյունիք պատահական չէր․ Մոսկվան փորձում է ուղերձներ հղել Վաշինգտոնին՝ Քրիստինա Քվինի այցից հետո
Քաղաքականություն
16.06.2023 | 21:15
Այսօր Սյունիքի մարզ է այցելել ՌԴ նախագահի աշխատակազմի արտասահմանյան երկրների հետ միջտարածաշրջանային և մշակութային կապերի վարչության պետ Իգոր Մասլովը։ Նրա ղեկավարած պատվիրակությունը մի շարք հանդիպումներ է ունեցել մարզում։
Factor.am-ին դիվանագիտական աղբյուրներից հայտնի դարձավ, որ Իգոր Մասլովի այցը պատահական չէ, այն կապ ունի ՀՀ-ում ԱՄՆ դեսպան Քրիստինա Քվինի՝ հունիսի 8-ին Սյունիք կատարած այցի հետ։
Նշենք, որ ԱՄՆ դեսպանն այցելել էր Տեղ գյուղ, որտեղ անմիջականորեն ականատես էր եղել սահմանին տիրող լարված իրավիճակին։ Բարձրաստիճան պաշտոնյաներից մեկը Factor.am-ի հետ զրույցում նշել է, որ Մոսկվան Իգոր Մասլովին Սյունիք ուղարկելով՝ ցանկանում է Վաշինգտոնին և Բրյուսելին ցույց տալ, որ տարածաշրջանը ՌԴ-ի վերահսկողության գոտում է։
Հիշեցնենք, որ Եվրոպական միությունն էլ մարզում «Դիմակայուն Սյունիք» ծրագիրն է իրականացնում, որի շրջանակում առաջիկա հինգ տարիների ընթացքում պատրաստվում է շուրջ 120 մլն եվրո ներդնել։
Նշենք, որ ՌԴ-ն ցանկանում է Սյունիքում հյուպատոսարան բացել՝ արագացված ընթացակարգով։ Պայմանավորվածությունը ձեռք է բերվել Նիկոլ Փաշինյանի և Վլադիմիր Պուտինի՝ մայիսի 16-ին տեղի ունեցած առանձնազրույցի ժամանակ։ Ավելի վաղ էլ՝ 2022 թվականի հոկտեմբերի 21-ին, Իրանն էր Կապանում հյուպատոսություն հիմնել։
Factor.am-ը մեկ այլ աղբյուրից էլ տեղեկացավ, որ Սյունիքը նաև պաշտոնական Տոկիոյի հետաքրքրության կենտրոնում է հայտնվել։ Առաջիկա մի քանի օրերի ընթացքում նախատեսվում է ՀՀ-ում Ճապոնիայի դեսպանի այցը Սյունիքի մարզ։
Նարեկ Կիրակոսյան
