Թբիլիսին պատրաստ է ապագայում էլ քայլեր ձեռնարկել Հայաստանի և Ադրբեջանի միջև երկխոսության համար․ Վրաստանի ԱԳ նախարար

Վրաստանի ԱԳ նախարար Իլյա Դարչիաշվիլին խորհրդարանում ելույթի ընթացքում հայտարարել է, որ «Թբիլիսիի արտաքին քաղաքականությունը հարևան երկրների նկատմամբ կենտրոնացած է հավասարակշռված գործընկերության և փոխշահավետ համագործակցության վրա», հաղորդում է Վրաստանի Առաջին ալիքը։

Նա նշել է, որ Վրաստանն ինտենսիվ աշխատում է տարածաշրջանում խաղաղության և կայունության ամրապնդման համար։

«Մեր նպատակն է նպաստել տարածաշրջանում խաղաղությանը, կայունությանը, բարիդրացիությանը և տնտեսական զարգացմանը։ Մենք ինտենսիվ աշխատում ենք այս ուղղությամբ, և դա մեր հիմնական առաջնահերթություններից է։ Խաղաղ հարևանության նախաձեռնության շրջանակում Վրաստանն արդյունավետ քայլեր է ձեռնարկել երկու հարևան երկրների միջև կառուցողական երկխոսության ուղղությամբ (Հայաստանի և Ադրբեջանի – խմբ․)։ Մենք պատրաստակամություն ենք հայտնում ապագայում շարունակել մեր մասնակցությունն այս ուղղությամբ, քանի որ կարծում ենք, որ Վրաստանը բնական դեր է խաղում տարածաշրջանում խաղաղության և կայունության ապահովման գործում։ Մենք պատրաստակամություն ենք հայտնում ցանկացած պահի մեր արժեքավոր ներդրումն ունենալ»,- հայտարարել է Դարչիաշվիլին:

Նա նշել է, որ «բոլորը լավ հիշում են Վրաստանի վարչապետի անձնական ներգրավվածությունն այդ գործընթացում և կոնկրետ արդյունքները, որոնք բերեցին նրա ջանքերը՝ երկու հարավային հարևաններին մերձեցնելու և հարաբերությունները բարելավելու համար»։

Էմմա Չոբանյան