19.02.2026 | 14:56
Նախագահ Վահագն Խաչատուրյանը Հունաստանում այցելել է Բյուզանդական և քրիստոնեական մշակույթի թանգարան
139 մլն դրամ եկամուտ․ Սուրեն Պապիկյանի հայտարարագիրը․ ՏԵՍԱՆՅՈՒԹ
Քաղաքականություն
15.06.2023 | 20:02
ՀՀ պաշտպանության նախարար Սուրեն Պապիկյանն անցած տարի ստացել է ընդհանուր 139 մլն 24 հազար 69 դրամ եկամուտ, այդ թվում՝ 19 մլն 750 հազար դրամ, 22 հազար դոլար և 13 հազար 400 եվրո գումար՝ որպես նվեր։
Հաշվի առնելով, որ նախարարն անցած տարի ամուսնացել է և դուստր ունեցել, կարելի է ենթադրել, որ նվերներն այդ առիթներով են։
Կոռուպցիայի կանխարգելման հանձնաժողովին նախարարի ներկայացրած 2022 թվականի գույքի, եկամուտների, ծախսերի և շահերի հայտարարագրից տեղեկանում ենք, որ Սուրեն Պապիկյանը Պաշտպանության նախարարությունից ստացել է 21․5 մլն դրամ աշխատավարձ, 3.6 մլն դրամ՝ վարձակալության դիմաց ստացված վարձավճար կամ հատուցում, 12․5 մլն դրամ փոխառություն՝ «Կոնվերս բանկ» ՓԲԸ-ից, ևս մեկ փոխառություն՝ մոտ 65․6 մլն դրամ՝ «Հայէկոնոմբանկ»-ից, 1․8 մլն դրամ հիփոթեքի եկամտահարկի վերադարձ։
Պապիկյանը հիփոթեքային 2 վարկ ունի, որոնցից մեկով 2019 թվականին միանձնյա ձեռք է բերել բնակարան «Երազ» բնակելի համալիրում, մյուսն անցած տարի «Բյուրեղ» բնակելի համալիրում բնակարան գնելու իրավունքի համար «Ջերմուկ Գրուպ» ՓԲԸ-ին վճարված գումարն է՝ 75․57 մլն դրամ։ Այս գործարքի մասին Ս․ Պապիկյանը լրագրողներին հայտնել էր, թե այն իրականացվել է դեռևս 2021 թվականին։
Նախարարն ունի ևս մեկ վարկ, որի մայր գումարի մնացորդը տարեվերջին կազմել է 124․9 հազար դրամ։ Սա հիփոթեք չէ, նպատակային նշանակությունը պաշտպանված է։ Ընդհանուր առմամբ, վարկի մարմանն ուղղվել է 15․8 մլն դրամ։
Պապիկյանը Լոռու մարզի Լոռի Բերդ բնակավայրում 2003 թվականից համատեղ սեփականությամբ ունի 3 հողամաս։
Նախարարը հայտարարագրել է, որ 2022-ի ընթացքում 90 օրից ավելի բնակվել է Երևանի Կենտրոն վարչական շրջանում գտնվող առանձնատանը (Կոնդի ամառանոց – խմբ․)։
Տրանսպորտային միջոց, արժեթղթեր, բանկային ավանդներ, 4 մլն դրամը գերազանցող այլ թանկարժեք իրեր, ըստ հայտարարագրի, նախարարը չունի։
2022 թվականի վերջին Պապիկյանի բանկային հաշիվներում եղել է 17․5 հազար դոլար, 11․6 մլն դրամ և մոտ 10 հազար եվրո գումար։ Նախարարը հայտարարագրել է նաև կանխիկ դրամական միջոցներ՝ 4.5 մլն դրամ, 21 հազար դոլար և 10 հազար եվրո։
Անցած տարի Պապիկյանը կատարել է 21․5 մլն դրամի միանվագ ծախս։ Դրա բովանդակությունը պաշտպանված է և հայտնի չէ։
Հայտարարագրում նշված է նաև, որ Սուրեն Պապիկյանը ԵՊՀ հոգաբարձուների խորհրդի նախագահ է, ՔՊ կուսակցության անդամ, կուսակցության վարչության նախագահ։
Նախարարի կինը՝ Արմինե Մուրադյանը, 2022-ին հայտարարագրել է միայն ստացված եկամուտները Հայաստանի տարածքային զարգացման հիմնադրամից՝ մոտ 4․3 մլն դրամ աշխատավարձ, նույն հիմնադրամից այլ եկամուտներ՝ 3․3 մլն դրամ, և վարձակալության դիմաց՝ 1.8 մլն դրամ։
Մանրամասները՝ տեսանյութում։
Գայանե Խաչատրյան
