Ձեր բանաձևը Արցախի հարցը չլուծելն էր․ ռեզինը ձգել եք, մի օր պետք է պոկվեր․ Կոնջորյանը՝ ընդդիմությանը. ՏԵՍԱՆՅՈՒԹ

Այսօր ԱԺ-ում 2022 թվականի պետական բյուջեի կատարողականի վերաբերյալ զեկույցի քննարկման ժամանակ «Քաղաքացիական պայմանագիր» խմբակցության անունից ելույթ ունեցավ խմբակցության ղեկավար Հայկ Կոնջորյանը։ Նա նշեց, որ ինքը կպատասխանի որոշ մեկնաբանություններրի և քաղաքական նկատառումներ կանի։

Անդրադառնալով «Հայաստան» խմբակցության ղեկավար Սեյրան Օհանյանի դիտարկումներին՝ Կոնջորյանը նշեց․ «Պարոն Օհանյան, խորհրդարանական ընդդիմությունը, ընտրություններից հետո, այս գումարման խորհրդարանի ձևավորումից հետո, իր համար որդեգրել է հետևյալ բանաձևը՝ ցանկացած բնագավառում, ինչ էլ որ լինի, լինի դա բյուջե, բյուջեի կատարողական, կառավարության ծրագիր, ցանկացած բան որ լինի, բանաձևը հետևյալն է՝ պիտի ձևավորել այնպիսի նարատիվ, որ ինչ վատ բան այս երկրում տեղի է ունենում, դրա մեղավորներն իշխանություններն են, ինչ լավ բան այս երկրում տեղի է ունենում, իշխանությունները դրա հետ ոչ մի կապ չունեն»,-ասաց Հայկ Կոնջորյանը։

Նրա խոսքով՝ արհեստականորեն փաստերը կոնկրետ բանաձևի մեջ տեղավորելով, իրականությունը խեղաթյուրելու քաղաքականություն է մշակում և իրագործում ընդդիմությունը։ Պատգամավորը նշեց, որ նույնիսկ դրա գիտական բացատրությունը կա, որը կոչվում է «պրոկրուստյան մահիճ»։
Անվան ծագումը հետևյալն է՝ հին հունական դիցաբանության մեջ մի հերոս կար՝ Պրոկրուստեսը, որն ավազակ էր, բայց ուներ մի իջևանատուն և երբ որ հյուրերը գալիս էին այդ իջևանատուն, նա մահճի վրա, որպեսզի կատարյալ տեղավորեր իր հյուրերին, բոյովների ոտքերը կտրում էր, կոլոտների ոտքերը ձգում էր, որպեսզի իր պատկերացրած կատարելությունը ստանար։

«Եվ հիմա, դա գիտության մեջ կոչվում է «պրոկրուստյան մահիճ»։ Երբ որ դու փաստը այնպես ես ձգում, պոկում, երկարացնում, քերում կարճացնում, որ հարմարեցնես քո պատկերացումներին, քո կանխավարկածին։ Եվ այն ինչը որ դուք անում եք՝ դասական «պրոկրուստյան մահիճ» է»,-ասաց Հայկ Կոնջորյանը։

Այնուհետև նա ասաց, որ ընդդիմությունն ասում է, թե, որպես իշխանություն իրենք ինքննադատություն չունեն, սակայն Հայկ Կոնջորյանը նշեց, որ իրենց ինքնաքննադատության ամենավճռական ակտը եղել է 2021 թվականի արտահերթ խորհդարանական ընտրությունները։

«Պարոն Օհանյան, ցանկացած չմեխած մեխ, կարող է հանգեցնել պատերազմի և պարտության, և ձեր չմեխած մեխերի պատճառով է, որ – պատերազմը սկսվեց, և այդ պատճառով է, որ պարտվեցինք․․․ խոսում եք Արցախից․․․ ղարաբաղի հարցի լուծման ձեր բանաձևը ղարաբաղի հարցը չլուծելն էր․․․ ռեզինը ձգել-ձգել եք, չգիտակցելով, որ մի օր պետք է պոկվեր։ Եվ հիմա եկել, խոսում եք պատասխանատվության, պետական իանստիտուտների մասին»,- ընդգծեց Կոնջորյանը։

Մանրամասները՝ տեսանյութում։