09.04.2026 | 23:32
Պուտինը հայտարարել է «զատկական հրադադար»
Եվրահանձնաժողովը Google-ին մեղադրում է գերիշխող դիրքը չարաշահելու մեջ․ ընկերությանը սպառնում է գլոբալ հասույթի 10 տոկոսի չափով տուգանք
Քաղաքականություն
14.06.2023 | 23:17
ԵՄ հակամենաշնորհային մարմնի և Google-ի միջև առճակատման ևս մեկ փուլ է սկսվել։ Եվրահանձնաժողովն ամերիկյան ընկերությանը մեղադրել է թվային գովազդի ոլորտում գերիշխող դիրքը չարաշահելու մեջ։ Բրյուսելի պաշտոնյաները նման նախնական եզրակացության են եկել երկամյա հետաքննությունից հետո, գրում է Euronews-ը։
Հաղորդագրության մեջ ասվում է, որ Google-ն առաջնահերթություն է տալիս տեխնոլոգիաների վրա հիմնված սեփական գովազդային ծառայություններին՝ «ի վնաս մրցակցող գովազդային տեխնոլոգիաների մատակարարների, գովազդատուների և առցանց հրատարակիչների», ինչը թույլ է տալիս ընկերությանը բարձրացնել սակագները:
«Աշխատանքի ներկա փուլում մենք կարծում ենք, որ Google-ի վարքագիծը շուկայում կարելի է հավասարեցնել չարաշահման գերակա դիրքի հետ։ Եթե դա ապացուցվի, ընկերության գործողությունները կհամարվեն անօրինական՝ մեր կանոնների համաձայն։ Եթե գանք եզրակացության, որ Google-ը խախտում է օրենքը, մենք ճանապարհ կգտնենք դա կասեցնելու համար»,- ասել է մրցակցության հարցերով եվրահանձնակատար Մարգրետե Վեստագերը։
ԵՄ-ն իրականում Google-ին հայտնում է շահութաբեր բիզնեսը բաժանելու և գովազդային ծառայությունների մի մասից հրաժարվելու անհրաժեշտության մասին։ Եթե հակամենաշնորհային խախտումները հաստատվեն, Google-ին կսպառնա տուգանք՝ համաշխարհային տարեկան հասույթի մինչև 10 տոկոսի չափով:
«Մենք համաձայն չենք Եվրահանձնաժողովի կարծիքի հետ»,- տեղեկությունը մեկնաբանել է Google-ի գլոբալ գովազդի գծով փոխնախագահ Դեն Թեյլորը։
Հավելենք, որ ամերիկյան ընկերությունը ԵՄ-ի կողմից արդեն տուգանվել է 8 մլրդ եվրոյի չափով՝ հակամրցակցային գործողությունների համար։
Էմմա Չոբանյան
