08.10.2026 | 12:17
Աշխարհի ու Եվրոպայի չեմպիոն Դավիդ Սիլվան 40 տարեկանում վերսկել է կարիերան
ԵԽԽՎ համազեկուցողները հույս են հայտնել, որ ռուս խաղաղապահները 2025թ․ կլքեն ԼՂ-ն, նաև Բաքվին կոչ են արել ապահովել Լաչինի միջանցքով ազատ տեղաշարժը
Քաղաքականություն
14.06.2023 | 17:49
Եվրոպայի խորհրդի խորհրդարանական վեհաժողովի (ԵԽԽՎ) Ադրբեջանի մոնիթորինգի համազեկուցողները, ավարտելով հնգօրյա այցը Բաքու (2023 թվականի հունիսի 3-7-ը), հանդես են եկել հայտարարությամբ։
Իան Լիդելլ-Գրեյնգերը (Միացյալ Թագավորություն, EC/DA) և Լիզ Քրիստոֆերսենը (Նորվեգիա, SOC) հայտարարության մեջ նշել են, որ այցի ընթացքում բարձրացրել են մի շարք մտահոգություններ՝ կապված բազմակարծության ժողովրդավարության, օրենքի գերակայության և մարդու իրավունքների հետ, ինչպես ասվում է Ադրբեջանի մոնիթորինգի վերաբերյալ Վեհաժողովի վերջին բանաձևում։
Նրանք հանդես են եկել մի շարք գնահատականներով և առաջարկություններով՝ խոսքի ազատության, ՀԿ-ների իրավիճակի, դատական համակարգի անկախության, կոռուպցիայի դեմ պայքարի, քաղաքական դրդապատճառներով կալանավորված բանտարկյալների, Մարդու իրավունքների եվրոպական դատարանի վճիռների կատարման վերաբերյալ։ Անդրադարձ է եղել նաև Լեռնային Ղարաբաղի հակամարտությանը վերաբերող մի շարք հարցերի։
«Ինչ վերաբերում է Լեռնային Ղարաբաղի հակամարտությանն առնչվող հարցերին, մենք ողջունում ենք Ադրբեջանի և Հայաստանի կողմից ձեռք բերված վերջին առաջընթացը խաղաղ համաձայնագրի հարցում և հորդորում ենք երկու կառավարություններին՝ ակտիվացնել երկկողմ բանակցություններն այս առումով»,- ասվում է հայտարարության մեջ։
Համազեկուցողները նաև ողջունել են Ադրբեջանի ականազերծման աշխատանքները և կոչ արել ապահովել Լաչինի միջանցքով ազատ տեղաշարժը։
«Ինչ վերաբերում է Լաչինի միջանցքում տիրող իրավիճակին, մենք վերահաստատում ենք ազատ տեղաշարժի ապահովման մեր կոչը՝ համաձայն մեր նախորդ հայտարարությունների, Մարդու իրավունքների եվրոպական դատարանի՝ 2022 թվականի դեկտեմբերի 21-ի որոշման և Արդարադատության միջազգային դատարանի 2023 թվականի փետրվարի 22-ի որոշման։ Նաև հույս ենք հայտնում, որ Ռուսաստանի Դաշնության խաղաղապահ ուժերը կլքեն տարածքը ամենաուշը մինչև 2025 թվականի նոյեմբեր»,- ասվում է հայտարարության մեջ։
Հավելենք, որ ապրիլի 23-ից Լաչինի միջանցքում Ադրբեջանն ապօրինի անցակետ է տեղադրել՝ է՛լ ավելի խորացնելով Արցախում հումանիտար ճգնաժամը։
Էմմա Չոբանյան
