2022-ի կատարողականը էապես բարելավվել է․ կապիտալ ծախսերի բարձր կատարողական է արձանագրվել․ Գալստյան․ ՏԵՍԱՆՅՈՒԹ

«Պետական բյուջեի կատարման տարեկան հաշվետվության վերաբերյալ եզրակացության կազմման շրջանակում ԿԲ-ն առաջնորդվել է կատարողականի վերաբերյալ երեք մոտեցմամբ. առաջինը միջնաժամկետ պարտքի կայունության ապահովումն է, երկրորդը՝ հարկաբյուջետային քաղաքականության ուղղվածությունը և դիրքը, ինչպես նաև երկարաժամկետ աճին նպաստելու ուղղությամբ գնահատականների ներկայացումը»,- ներկայացնելով ԿԲ եզրակացությունը ՀՀ 2022 թվականի պետական բյուջեի կատարման տարեկան հաշվետվության վերաբերյալ՝ նշեց հարակից զեկուցող ԿԲ նախագահ Մարտին Գալստյանը։

Ըստ հարակից զեկուցողի` աշխարհաքաղաքական մարտահրավերներով և էական տնտեսական անորոշություններով ուղեկցվող 2022 թվականին համաշխարհային տնտեսությունում, այդ թվում` ՀՀ գործընկեր երկրներում արձանագրվել է տնտեսական աճի տեմպի դանդաղում: Այդուհանդերձ, գործընկեր երկրներում էական տնտեսական խնդիրներին զուգահեռ Հայաստանի տնտեսությունը 2022 թվականին արձանագրել է զգալի դրական զարգացումներ, ինչը Մարտին Գալստյանի գնահատմամբ մեծամասամբ պայմանավորված է ռուս-ուկրաինական հակամարտության և ՌԴ նկատմամբ կիրառվող պատժամիջոցների հետևանքով ապրիլ ամսից դեպի Հայաստան միջազգային այցելուների, աշխատուժի, ընկերությունների և ֆինանսական կապիտալի էական ներհոսքով:
2022 թվականին Հայաստանում տնտեսական աճը գրեթե կրկնակի գերազանցել է բյուջեի նախագծով թիրախավորված ցուցանիշը` կազմելով 12,6 տոկոս:

Ստեղծված իրավիճակում գների կայունության ապահովման նպատակով 2022 թվականին ԿԲ-ն վարել է դրամավարկային պայմանների խստացման քաղաքականություն` բարձրացնելով քաղաքականության տոկոսադրույքն ընդհանուր երեք տոկոսային կետով:

ԿԲ նախագահի խոսքով՝ իրականացված զսպող դրամավարկային քաղաքականության, դրամի արժևորման և արտաքին հատվածից փոխանցվող գնաճային ազդեցությունների պատճառով տարվա երկրորդ կեսից սկսած նկատվել է թուլացում, և գնաճը երրորդ եռամսյակի սկզբից աստիճանաբար նվազել է ու տարեվերջին կազմել 8,3 տոկոս:

Մանրամասները՝ տեսանյութում։