Քաղաքականություն
14.06.2023 | 16:00
Շվեդիան բավարար քայլեր չի արել իր խոստումները կատարելու համար, քանի որ վերջերս թույլ է տվել PKK-ի կողմնակիցներին ցույցեր կազմակերպել: Թուրքական լրատվամիջոցների հաղորդմամբ՝ Ադրբեջանից վերադառնալիս ինքնաթիռում թուրք լրագրողների հետ զրույցում այս մասին հայտարարել է Թուրքիայի նախագահ Ռեջեփ Թայիփ Էրդողանը՝ ըստ էության, փակելով հաջորդ ամիս Վիլնյուսում կայանալիք ՆԱՏՕ-ի գագաթնաժողովում դաշինքին Շվեդիայի միանալու դուռը։
«Որպեսզի Անկարան աջակցի ՆԱՏՕ-ին Ստոկհոլմի անդամակցության դիմումին, Շվեդիան պետք է կատարի իր պարտավորություններն ահաբեկչության դեմ պայքարում։ Ես դա ասել եմ ՆԱՏՕ-ի գլխավոր քարտուղար Յենս Ստոլտենբերգին»,- ասել է Թուրքիայի նախագահը։
Նա հավելել է, որ առանց այդ հարցի լուծման՝ չեն կարող առաջ շարժվել։
«Մինչև այս հարցը չլուծվի, մենք չենք կարողանա հավանություն տալ Վիլնյուսում ՆԱՏՕ-ի գագաթնաժողովին»,- ասել է Էրդողանը։
Նա հիշեցրել է, որ թուրքական պատվիրակությունն այսօր մասնակցելու է Ֆինլանդիայի, Շվեդիայի և ՆԱՏՕ-ի պատվիրակների հետ չորրորդ հանդիպմանը։
«Թուրքիայի նախագահի դիրքորոշումն ակնհայտ է, Վիլնյուսից առանձնահատուկ ակնկալիքներ պետք չէ ունենալ»,- հավելել է Էրդողանը։
Հավելենք, որ Վիլնյուսում ՆԱՏՕ-ի գագաթնաժողովը տեղի է ունենալու հուլիսի 11-12-ը։
Էմմա Չոբանյան
