Պետք է հասնենք նրան, որ ժողովուրդը դուրս գա պայքարի․ Իշխան Սաղաթելյան

«Փաստաթուղթը, որի ստորագրման մասին խոսում է Նիկոլ Փաշինյանը, ոչ թե խաղաղության պայմանագիր է, այլ նոր կապիտուլացիա»,- այսօր հրավիրված ասուլիսին հայտարարեց ՀՅԴ Հայաստանի Գերագույն մարմնի ներկայացուցիչ վերընտրված Իշխան Սաղաթելյանը։

«Եթե դա ստորագրվի՝ աղետալի և ողբերգական հետևանքներ է ունենալու հայ ժողովրիդ համար։ Դա կանխելու միակ տարբերակը համաժողովրդական ընդվզումն է։ Մենք պետք է հասնենք նրան, որ ժողովուրդը դուրս գա պայքարի։ Մեր առաջիկա քայլերն ու գործողությունները ուղղված են լինելու դրան։ Եթե երկրի ներսում չլինի դիմադիրություն, եթե օրվա իշխանությունը հասկանա, որ կարող է այդ փաստաթուղթը ստորագրել և մարսել, ապա իրենք դա կանեն»,- ասաց ընդդիմադիր գործիչը։

Թե ոնց են կազմակերպելու այդ ընդվզումը և երբ են սկսելու կոնկրետ գործողություններ, Սաղաթելյանը չհստակեցրեց։ «Կոնկրետ օր, ժամ տեղ չեմ կարող ասել, բայց որ մեր ուժերի ողջ ծավալով լծվելու ենք այդ գործին միանշանակ է»,- շարունակեց նա։

Մինչ այդ պատրաստվում են քննարկումներ սկսել խորհրդարանական, և արտախորհրդարանական ուժերի հետ։

«Պետք է մարդկանց հստակ բացատրել, թե ինչ է սպասվում։ Ունենք սպասվող աղետի մասին մարդկանց բացատրելու խնդիր, նախորդ անհաջողությունների պատճառը եղել է այն, որ չենք կարողացել նրանց բացատրել, թե իրականում ինչ է կատարվում»,- հավելեց Սաղաթելյանը։ Ըստ նրա՝ իշխանության քաղաքականությունը՝ «հանձնվել հանուն փրկության, ինքնաոչնրչացում է»։