Ռազմական գործողությունների ժամանակ եթե վառելիք չի ապահովվում, քրեական պատասխանատվություն կա՞․ Արծվիկ Մինասյան․ ՏԵՍԱՆՅՈՒԹ

Ազգային ժողովը քննարկեց «Վարչական իրավախախտումների վերաբերյալ ՀՀ օրենսգրքում լրացումներ և փոփոխություններ կատարելու մասին» և «Նյութական պահուստի մասին» օրենքում լրացումներ կատարելու մասին» նախագծերի փաթեթը։ Ըստ այդմ՝ կազմակերպությունների կողմից լիազոր մարմնին սահմանված ժամկետներում և կարգով ռազմավարական պաշարների պահուստի անվանացանկում ներառված ապրանքների վերաբերյալ հաշվետվություն չներկայացնելու դեպքում նախատեսվել է վարչական պատասխանատվություն:

ՆԳՆ փոխնախարար Դավիթ համբարյանի դիտարկմամբ՝ գործնականում այսօր ստեղծված է իրավիճակ, երբ կազմակերպությունների դրսեւորած անգործությունը մնում է անհետեւանք, քանի որ չկա պետական հարկադրանքի որեւէ միջոց, եւ լիազոր մարմինը չունի որեւէ լծակ` իրենց պարտավորության պատշաճ կատարումը կազմակերպություններին պարտադրելու համար։
«Հայաստան» խմբակցության պատգամավոր Արծվիկ Մինասյանը հետաքրքրվեց․ «Գաղտնիք չէ, որ ռազմավարական պաշարների, հատկապես կրիտիկական ծավալների ապահովումն անվտանգության առաջնային խնդիր է։ Արդյոք քննարկվե՞լ է նաև հարցը, որ կարևորագույն կենսական նշանակության սովամահության կամ ռազմական գործողությունների շրջանակում անհրաժեշտ վառելիք և այլ ապրանքներ, եթե չի ապահովում որևէ մեկը, ապա ենթարկվի քրեական պատասխանատվության»։

Դավիթ Համբարյանը պատասխանեց, որ պաշարների անվտանգությունն ապահովվում է ոչ միայն ռազմավարական պաշարներով, այլ նաև պետական պահուստի բաղադրիչներով։

«Այս առումով մենք վերահսկելիություն ու կառավարում ունենք։ Ինչ վերաբերում է քրեական պատասխանատվությանը, տվյալ կազմակերպությունների բարեխղճությունը, մակարդակը մոնիթորինգ անելուց հետո, հասկանալով հնարավոր խնդիրները, կարծում եմ՝ կարելի է անդրադառնալ դրան։ Եթե լինեն խնդիրներ, ընդհուպ մինչև քրեական պատասխանատվության ենթարկելու հավանականությունը ես չեմ բացառի։ Բայց կարծում եմ՝ առաջարկվող վարչական իրավախախտումներով և համապատասխան վերահսկողությամբ մենք ռեալ կարող ենք դաշտը հասկանալ և վերահսկողության տակ պահել»։

Մանրամասները՝ տեսանյութում։