Ուկրաինան հայտարարել է Դոնեցկի շրջանի մի շարք բնակավայրերի ազատագրման մասին

Ուկրաինայի պաշտպանության փոխնախարար Աննա Մալյարը նախօրեին հայտարարել էր Դոնեցկի մարզի Բլագոդատնոյե գյուղի ազատագրման մասին և հայտնել, որ նույն շրջանի Մակարովկա գյուղը նույնպես վերադարձել է ուկրաինական կողմի վերահսկողության տակ։

Այդուհանդերձ, Ուկրաինայի Զինված ուժերի գլխավոր շտաբը այսօրվա զեկույցում չի հայտարարել երկու գյուղերի ազատագրման մասին, որոնց մասին հայտնել էր Մայլարը, գրում է BBC-ի ռուսական ծառայությունը։ Գլխավոր շտաբը Բլագոդատնոեն նշում է այն բնակավայրերի մեջ, որտեղ ռուս զինվորականները օդային հարվածներ են հասցրել։ Ամփոփման մեջ Մակարովկան ընդհանրապես չի նշվում։

Պատերազմի ուսումնասիրության ամերիկյան ինստիտուտը (ISW), հիմնվելով բաց տվյալների վրա, իր ամենօրյա ամփոփագրում նշում է, որ ուկրաինական զորքերը գրավել են Բլագոդատնոյեն, Մակարովկան և այս տարածքում գտնվող առնվազն երկու այլ գյուղեր՝ Նեսկուչնոեն և Ստորոժևոեն:

Ուկրաինայի ԶՈՒ-ի  35-րդ բրիգադը առավոտյան հայտարարել է, որ  հաջողվել է գրավել Ստորոժևոեն, որը 2022թ-ի մարտից ռուսական վերահսկողության տակ էր։ «Ստորոժևոյում կրկին ծածանվում է պետական դրոշը, և այդպես է լինելու ամեն բնակավայրի հետ, քանի դեռ մենք չենք ազատագրել բոլոր ուկրաինական հողերը»,-գրել է Մայլարը։

ՌԴ ՊՆ-ն չի մեկնաբանում այս բնակավայրերի գրավման մասին տեղեկությունները։ Ռուսական ՊՆ-ին մոտ կանգնած տելեգրամ ալիքները հայտնել էին, որ ուկրաինական զորքերը Նեսկուչնոյե  և Բլագոդատնոյե բնակավայրերը գրավել են գրեթե առանց դիմադրության։