Իրանի և Ադրբեջանի ԱԳ նախարարները երկու երկրների միջև առկա խնդիրներն ու դրանց լուծման ուղիներն են քննարկել

Իրանի ԱԳ նախարար Հոսեյն Ամիր Աբդոլահիանն ու Ադրբեջանի ԱԳ նախարար Ջեյհուն Բայրամովը երեկ ուշ երեկոյան հեռախոսազրույցի ընթացքում քննարկել են երկկողմ հարաբերությունների վերջին վիճակը, գրում է Մեհր գործակալությունը։

Նշվում է, որ երկար զրույցի ընթացքում կողմերն ընդգծել են խնդիրների լուծման նպատակով խորհրդակցությունների շարունակման և տարբեր ոլորտներում տեխնիկական ու մասնագիտացված պատվիրակությունների փոխանակման անհրաժեշտությունը։

«Նախարարները քննարկել են նաև կողմերի միջև առկա վերջին խնդիրները և ընդգծել թյուրըմբռնումները հարթելու, երկու երկրների հարաբերությունները բնական ճանապարհի վրա դնելու անհրաժեշտությունը՝ բարիդրացիության սկզբունքին և երկու ժողովուրդների ընդհանուր շահերին համապատասխան»,- ասվում է հայտարարության մեջ։

Ադրբեջանական կողմի տարածած հաղորդագրության մեջ ասվում է նաև, որ զրույցի ընթացքում նախարարները մտքեր են փոխանակել մի շարք տարածաշրջանային հարցերի շուրջ։

Հավելենք, որ Թեհրանի և Բաքվի հարաբերություններում առկա լարվածությունը այդպես էլ չի նվազում։ Օրերս Ադրբեջանի ԱԳՆ-ն սեփական քաղաքացիներին հորդորել էր Իրան չայցելել։ Վերջերս էլ տեղեկություններ էին  տարածվել, որ Իրանում Ադրբեջանի քաղաքացի Ֆարիդ Սաֆարլին է ձերբակալվել լրտեսության մեղադրանքով։ Ադրբեջանում ակտիվորեն շարունակվում են կրոնական տարբեր գործիչների ձերբակալություններն Իրանի օգտին լրտեսություն կատարելու կասկածանքով։

Էմմա Չոբանյան