15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Ադրբեջանում իշխանություններին քննադատելու համար ընդդիմադիր գործչին հոգեբուժարան են տարել
Քաղաքականություն
08.06.2023 | 22:50
Ադրբեջանի իշխանությունները շարունակում են ռեպրեսիաները ընդդիմադիր գործիչների նկատմամբ։ Մասնավորապես, Ադրբեջանի ընդդիմադիր «Ժողովրդավարություն և բարգավաճում» կուսակցության անդամ Զիյաֆետ Աբբասովային հունիսի 6-ին տեղափոխել են հոգեբուժարան՝ հարկադիր բուժման։ Խոսքը Մաշթաղա բնակավայրի թիվ 1 հանրապետական հոգենյարդաբանական դիսպանսերի մասին է, գրում են ադրբեջանական լրատվամիջոցները։
Դեպքի մասին լրատվամիջոցներին ահազանգել է կուսակցության նախագահ Գուբադ Իբադօղլուն։ Նա նշել է, որ Աբբասովայի հարազատներին այս մասին հայտնել են միայն հաջորդ օրը։ Իբադօղլուն նշել է, որ Աբբասովան հոգեպես բացարձակապես առողջ է, և նրան հոգեբուժարան են ուղարկել իշխանություններին քննադատելու պատճառով։
Բացի այդ, ըստ նրա՝ Աբբասովայի դեմ ձեռնարկված միջոցներն ուղղված են ժողովրդին ահաբեկելուն, քննադատական ձայները ճնշելուն, կոռուպցիայի բացահայտումները կանխելուն։
«Ժողովրդի մասին հոգ տանելու և նրանց խնդիրները լուծելու փոխարեն՝ այս կառավարությունը շարունակում է ակտիվ քաղաքացիներին հասարակությունից հեռացնելու կամ պատժելու գիծը»,- ասել է Իբադօղլուն՝ պահանջելով ազատ արձակել Աբբասովային։
Իր հերթին, կուսակցության փոխնախագահ Ադալաթ Յուսիբովն ասել է, որ ոստիկանությունն արդեն զգուշացրել է Աբբասովային, որ եթե չդադարեցնի համացանցում իր ելույթները և լրատվամիջոցների հետ հարցազրույցները, ապա նրան «կտեղավորեն հոգեբուժարանում»։ YouTube-յան ալիքներից մեկին տված վերջին հարցազրույցի ժամանակ ոստիկանները մոտեցել են նրան և ասել, որ սա վերջին նախազգուշացումն է, և եթե Աբբասովան եզրակացություններ չանի, կհայտնվի «Մաշթաղայում», այսինքն՝ հոգեբուժարանում։
«Մենք գնացինք հիվանդանոց, սակայն մեզ թույլ չտեցվին հանդիպել նրա հետ»,- ասել է Յուսիբովը։
Հոգեբուժարանի հերթապահ բժիշկ Յագութ Ագարիզաևան ասել է, որ Աբբասովային այնտեղ են բերել ոստիկանությունը և շտապօգնության աշխատակիցները։ Բժիշկը, սակայն, չի ասել, թե Աբբասովան ինչ ախտորոշմամբ է ընդունվել հաստատություն։
Նշենք, որ հարևան երկրում սովորական են դարձել քաղաքական ընդդիմախոսներին հոգեբուժարաններում փակելու դեպքերը։ Ադրբեջանի Ժողովրդական ճակատ կուսակցության անդամ Ֆուզուլի Հուսեյնովը, որն առաջին անգամ ձերբակալվել էր 2017 թվականին, հոսպիտալացվել է թիվ 1 հանրապետական հոգեբուժական հիվանդանոց։ Ավելի ուշ՝ 2020 թվականին, այնտեղ են տեղափոխել նաև կուսակցության մեկ այլ անդամի՝ Ագիլ Գումբատովին։ Երկուսն էլ նշում են, որ իրենց տեղափոխել են հոգեբուժարան՝ պատժելու իրենց քաղաքական գործունեության համար: Պաշտոնական կառույցները հերքում են այս պնդումները։
Էմմա Չոբանյան
