«Բարձրավոլտ Էլեկտրացանցերի» և «Կալուգագլավսնաբի» միջև կապն ու ծախսված միջոցների արդյունավետությունը Կառավարությունը դեռ կուսումնասիրի․ ՏԵՍԱՆՅՈՒԹ

ՀՀ էներգետիկայի և բնական պաշարների նախարար Արթուր Գրիգորյանը գործադիրի այսօրվա նիստում առաջարկեց փոփոխություն կատարել Կառավարության՝ 2018 թվականի պետական բյուջեում ՀՀ կառավարության 2017 թվականի դեկտեմբերի 28-ի N 1717-Ն որոշման մեջ։

Ըստ այս որոշման՝ Գերմանիայի զարգացման վարկերի բանկի աջակցությամբ իրականացվող Գյումրի-2 ենթակայանի վերականգնման ծրագրի իրականացման արդյունքում տնտեսվել է 1,477.6 հազ. եվրո, որը Գերմանիայի զարգացման վարկերի բանկի (KfW) և ՀՀ կառավարության համաձայնությամբ նպատակաուղղվել է ենթակայանների սպասարկման համար անհրաժեշտ գործիքների և մեքենա-մեխանիզմների ձեռքբերմանը:

Իրականացված միջազգային մրցույթի արդյունքում «Բարձրավոլտ Էլեկտրացանցեր» ՓԲԸ և «Կալուգագլավսնաբ» ԲԲԸ/«Ռուսկոմտրանս» ՍՊԸ կոնսորցիումի միջև կնքվել է մեքենա-մեխանիզմների և պահեստամասերի ձեռքբերման պայմանագիր՝ ընդհանուր 1,432.9 հազ. եվրո գումարով:

Վարչապետ Նիկոլ Փաշինյանը նախարարից հետաքրքրվեց՝ ինչպես է այս երկու ընկերությունների միջև կնքվել համաձայնագիր, արդյոք այն տեղի է ունեցել հայտարարված մրցույթի արդյուքնում, թե ոչ՝ հաշվի առնելով «Բարձրավոլտ Էլեկտրացանցերի» և «Կալուգագլավսնաբի» միջև հնարավոր կապերը։ 

Վարչապետը նաև հետաքրքրվեց՝ արդյոք համաձայնագրով նախատեսված գործողություններն իրականացվե՞լ են,  արդյոք դրանց համար կատարված ծախսն արդյունավե՞տ է։

Նախարար Գրիգորյանը նշեց, որ քանի որ նախորդ տարի է կնքվել համաձայնագիրը, ապա ծախսված միջոցների արդյունավետության առումով զերծ կմնա գնահատականներ տալուց։

Որոշման նախագիծը չընդունվեց, քանի որ Կառավարությոնը դրան ավելի ուշ կանդրադառնա։ 

Մանրամասները՝ տեսանյութում։