Ուկրաինան ՌԴ-ի ներսում գործակալների ցանց է ստեղծել, որոնց Կիևը հարձակումների համար ԱԹՍ-ներ է տրամադրում․ CNN

Ուկրաինան Ռուսաստանում գործակալների և համախոհների ցանց է ստեղծել, որոնք ներգրավված են դիվերսիաների մեջ, իսկ դրա համար Կիևը նրանց անօդաչու սարքեր է տրամադրում։ Այս մասին հայտնում է CNN-ը՝ հղում անելով ամերիկյան հետախուզության տվյալներին ծանոթ իր աղբյուրներին։

Ամերիկացի պաշտոնյաները կարծում են, որ Ռուսաստանի ներսում գտնվող ուկրաինամետ գործակալները մայիսի սկզբին անօդաչու թռչող սարքով հարձակում են իրականացրել Կրեմլի վրա՝ ԱԹՍ-ները Ռուսաստանից արձակելով։

Պարզ չէ, սակայն, թե վերջին օրերին իրականացված անօդաչու սարքերի այլ հարձակումները, այդ թվում՝ Մոսկվայի մերձակայքում գտնվող բնակելի թաղամասի թիրախավորումը և Ռուսաստանի հարավում գտնվող նավթավերամշակման գործարանների վրա հարձակումները, նույնպես իրականացվել են Ռուսաստանի ներսի՞ց, թե՞ ուկրաինամետ գործակալների այս ցանցի կողմից։

Նշվում է, որ Ուկրաինան նրանց տրամադրել է ուկրաինական արտադրության անօդաչու թռչող սարքեր, և ԱՄՆ երկու պաշտոնյաներ CNN-ին ասել են, որ ապացույցներ չկան, որ այս հարձակումներից որևէ մեկն իրականացվել է ԱՄՆ-ի կողմից տրամադրված ԱԹՍ-ներով։

Պաշտոնյաները չեն կարող հստակ ասել, թե ինչպես է Ուկրաինային հաջողվել անօդաչուները հասցնել թշնամու թիկունք, սակայն երկու աղբյուրներ լրատվամիջոցին հայտնել են, որ այն ստեղծել է մաքսանենգության լավ երթուղիներ, որոնք կարող են օգտագործվել անօդաչու սարքերը կամ դրանց բաղադրիչները Ռուսաստան ուղարկելու համար, որտեղ դրանք կարող են այնուհետև հավաքվել:

Եվրոպական հետախուզության աշխատակիցն էլ նշել է, որ ռուս-ուկրաինական սահմանը հսկայական է և դժվար վերահսկելի, ինչն այն հարմար է դարձնում մաքսանենգության համար:

Թե կոնկրետ ով է վերահսկում այդ աշխատանքը, պարզ չէ, սակայն CNN-ի աղբյուրներն ասել են, որ ըստ ԱՄՆ պաշտոնյաների՝ ուկրաինական հետախուզական համայնքի տարրերը ներգրավված են դրանում։

Ուկրաինայի անվտանգության ծառայության ղեկավարի խոսնակը, որին խնդրել են մեկնաբանել իրավիճակը, CNN-ի հետ զրույցում նշել է, որ  ռուսական հողի վրա առեղծվածային պայթյուններն ու անօդաչուների հարվածները շարունակվելու են։

Էմմա Չոբանյան