07.09.2026 | 19:32
Առողջության համընդհանուր ապահովագրության հիմնադրամի գլխավոր տնօրենի պաշտոնի համար կանցկացվի նոր մրցույթ
Ամերիկայի Միացյալ Նահանգները տոնում է Անկախության 242 ամյակը
Քաղաքականություն
03.07.2018 | 22:49
Հուլիսի 3-ին ԱՄՆ դեսպանատունը տոնեց Միացյալ Նահանգների անկախության 242 ամյակը՝ զայդեկո երաժշտությամբ, հյուրասիրությամբ ու հրավառությամբ զուգորդված մի գեղեցիկ ամառային միջոցառմամբ, որը տեղի ունեցավ դեսպանատան տարածքում: Միջոցառման ընթացքում ՀՀ-ում ԱՄՆ դեսպան Ռիչարդ Միլսը և միջոցառման պատվավոր հյուր, ՀՀ արտգործնախարար Զոհրաբ Մնացականյանը իրենց գոհունակությունը հայտնեցին Հայաստանի և Միացյալ Նահանգների սերտ գործընկերության վերաբերյալ:
Իր խոսքում դեսպան Միլսը նշեց, որ ԱՄՆ հիմնադիր հայրերը հանուն անկախության վտանգեցին իրենց կյանքը: «Նրանք անկախություն հռչակեցին ոչ նրա համար, որ իշխանությունը վերցնեն իրենց ձեռքը, այլ նրա համար, որ ձևավորեն մի համակարգ, որտեղ Աստծո կողմից տրված իրավունքները երաշխավորված կլինեն: Եվ այսօր ամերիկյան հեղափոխական ոգին մենք տոնում ենք նոր Հայաստանում, որտեղ Հայաստանի ժողովուրդը՝ ի դեմս ձեզ, ռիսկի դիմեց և կանգնեց հանուն իր իրավունքների: Այն ինչին մենք ականատես եղանք այս գարնանը մի շարժում էր, որին լիցք էին հաղորդում երիտասարդները, ովքեր իրենց երկրի համար նոր սկիզբ էին նախանշում», – ասաց դեսպան Միլսը: Նա գոհունակությամբ փաստեց, որ ներկա պետական կառավարման ու քաղաքացիական հասարակության առաջնորդների շարքում շատերը ԱՄՆ դեսպանության կրթական փոխանակման ծրագրերով ուսանել են ԱՄՆ-ում և վերադարձել նոր մտքերով ու գաղափարներով: «Այժմ նրանք պատրաստ են փոփոխությունների իրենց հայրենի երկրում՝ ձևավորելու թափանցիկ ժողովրդավարական հասարակություն, որտեղ հարգվում է իրավունքի գերակայությունը և որտեղ պաշտպանված են բոլորի իրավունքները»:
Հատուկ այս առիթով Հայաստան է ժամանել Դուեյն Դոփսի և Զայդեկո Հելռեյզերռս խումբը՝ դեսպան Միլսի ծննդավայր Լուիզիանա նահանգից: Հուլիսի 4-ին ժամը 17:00 ՀԲԸՄ-ի համաժողովների դահլիճում երաժիշտները կխոսեն Նյու Օռլեանում մշակույթների միախառնման արդյունքում ձևավորված զայդեկո երաժշտության մասին, ապա նույն օրը ժամը 20:00-ին Գաֆէսճեան քանդակների պարտեզում տեղի կունենա խմբի բացօթյա անվճար համերգը, որին աջակցում է Գաֆէսճեան արվեստի կենտրոնը:
1776թ. հուլիսի 4-ին ընդունվեց ԱՄՆ անկախության հռչակագիրը և այդ օրվանից ի վեր ամեն տարի հուլիսի 4-ը նշվում է որպես ԱՄՆ Անկախության օր:
