Հավաքական թիմերի մարզական կենտրոնի տարածքը չի մասնավորեցվի․ կստեղծվեն արդիական պայմաններ․ ՏԵՍԱՆՅՈՒԹ

ՀՀ կառավարությունն առաջարկում է Երևանի Ծիծեռնակաբերդի խճուղի 5 հասցեում տեղակայված Կարեն Դեմիրճյանի անվան մարզահամալիրը հանել մասնավորեցման ենթակա պետական գույքի ցանկից։

ՀՀ կրթության, գիտության, մշակույթի և սպորտի նախարար Ժաննա Անդրեասյանը կառավարության նիստում հայտնեց, որ մարզահամալիրը նախատեսվում է հիմնանորոգել և վերածել հավաքական թիմերի մարզման կենտրոնի, քանի որ Հայաստանում հավաքական թիմերի մարզումների համար նախատեսված մարզական հնարավորությունները խիստ սահմանափակ են։

Ծիծեռնակաբերդի խճուղում գտնվող մարզահամալիրն ունի ճաշարան, ննջարանային մասնաշենք՝ նախատեսված շուրջ 60 հոգու համար, 2 մարզադահլիճ՝ յուրաքանչյուրը 1600 քմ: Մարզադահլիճներից մեկը չափերով համապատասխանում է գեղարվեստական մարմնամարզության միջազգային չափորոշիչներին։ Այստեղ տարիներ շարունակ ուսումնամարզական գործընթաց է իրականացրել գեղարվեստական մարմնամարզության և ակրոբատիկայի մանկապատանեկան մարզադպրոցը: Մյուս մարզադահլիճը ծառայել է ըմբշամարտի, ձյուդոյի և բռնցքամարտի պարապմունքների համար:

Անդրեասյանը տեղեկացրեց, որ հավաքականների մարզումների համար Հայաստանն ունի ընդամենը երկու սահմանափակ մարզաբազա՝ Ծաղկաձորի և Օլիպավանի:

Հայտարարելով, որ սպորտի ոլորտում աննախադեպ ցուցանիշների են հասել և նախորդ տարի 307 մեդալ է բերվել Հայաստան, իսկ այս պահին արդեն 135 մեդալ ունենք, ԿԳՄՍ նախարարը նշեց, որ ձեռքբերումները պահպանելու համար ենթակառուցվածքներ են պետք և այդ նպատակով նաև իրականացնում են 12 մարզահամալիրի և մարզադպրոցի վերակառուցում:

Անդրեասյանը հույս հայտնեց, որ որոշմամբ նախատեսված միջոցառումների արդյունքում Ծիծեռնակաբերդի 5 հասցեում գտնվող մարզահամալիրը կբերեն միջազգային ստանդարտների:

Նախնական հաշվարկներով` համալիրի հիմնանորոգումն ու նախագծանախահաշվային փաստաթղթերի փորձաքննությունը կարժենա 2 299 750 340 դրամ:

Մանրամասները՝ տեսանյութում։