Ստոլտենբերգը հայտնել է, որ կայցելի Թուրքիա՝ առաջ մղելու ՆԱՏՕ-ին Շվեդիայի անդամակցության հարցը

ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ մոտ ապագայում կմեկնի Թուրքիա՝ նախագահ Ռեջեփ Թայիփ Էրդողանի վերընտրվելուց հետո դաշինքին Շվեդիայի անդամակցության վավերացումն առաջ մղելու համար, գրում է Al Arabiya-ն՝ վկայակոչելով  AFP-ին։

«Ես վստահ եմ, որ Շվեդիան կլինի անդամ, և մենք աշխատում ենք, որ դա տեղի ունենա որքան հնարավոր է՝ շուտ»,- ասել է Ստոլտենբերգն Օսլոյում ՆԱՏՕ-ի ԱԳ նախարարների հանդիպմանը։

Նա հայտնել է, որ այս շաբաթվա սկզբին արդեն հեռախոսով խոսել է Էրդողանի հետ՝ «ընդգծելու Շվեդիայի անդամակցության հարցում առաջընթացի կարևորությունը»:

Թուրքիան և Հունգարիան ՆԱՏՕ-ի անդամ միակ երկրներն են, որոնք դեռևս չեն վավերացրել Շվեդիայի անդամակցության հայտը։

Էրդողանը, որը կիրակի վերընտրվել է Թուրքիայի նախագահի պաշտոնում ևս հինգ տարի ժամկետով, Շվեդիային մեղադրում է «ահաբեկիչների», հատկապես՝ Քուրդիստանի աշխատավորական կուսակցության (PKK) անդամների ապաստարան լինելու մեջ։

Շվեդիայի ԱԳ նախարար Թոբիաս Բիլստրոմն էլ ասել է, որ Ստոկհոլմը ՆԱՏՕ-ին անդամակցելու «բոլոր պարտավորությունները» կատարել է և կոչ է արել Թուրքիային ու Հունգարիային թույլ տալ իր երկրին անդամակցել դաշինքին:

«Ժամանակն է, որ Թուրքիան և Հունգարիան սկսեն ՆԱՏՕ-ին Շվեդիայի անդամակցության վավերացումը»,- ասել է նա։

Բիլստրոմն ընդգծել է Շվեդիայում ահաբեկչության դեմ պայքարի մասին նոր օրենքի ուժի մեջ մտնելը՝ որպես վերջին քայլ Թուրքիայի հետ անցյալ տարի ստորագրված համաձայնագրի շրջանակում։ Նա հույս է հայտնել է, որ առաջիկա շաբաթներին Թուրքիայի ներկայացուցիչների հետ հանդիպմանը մեծ քայլ կտեսնի անդամակցության ուղղությամբ:

«Այդ հանդիպումից հետո տեղի կունենա վավերացումը»,- ասել է Շվեդիայի ԱԳ նախարարը։

Էմմա Չոբանյան