06.06.2026 | 16:10
Դատախազությունը զգուշացնում է՝ վարժական հավաքից խուսափելը հանցագործություն է. այն պատժվում է 1-3 տարի ժամկետով ազատազրկմամբ
Ամերիկացի սենատորներն առաջարկել են Ռուսաստանի համար հատուկ միջազգային տրիբունալ ստեղծել
Քաղաքականություն
01.06.2023 | 11:11
Ամերիկացի երկու սենատորներ առաջարկել են Ռուսաստանի համար հատուկ միջազգային տրիբունալ ստեղծել՝ Ուկրաինայի դեմ ապօրինի ագրեսիայի հետ կապված հանցագործությունները քննելու համար, գրում է VOA-ն։
Բանաձևի նախագիծն առաջարկել են դեմոկրատ սենատորներ Բեն Քարդինը` Սենատի արտաքին հարաբերությունների հանձնաժողովի ավագ անդամը, և Թիմ Քեյնը` Սենատի արտաքին հարաբերությունների և զինված ծառայությունների հանձնաժողովների անդամը:
Սենատորները հատուկ տրիբունալի անհրաժեշտությունը բացատրել են նրանով, որ ոչ Ուկրաինան, ոչ Ռուսաստանը չեն վավերացրել Միջազգային քրեական դատարանի (ՄՔԴ) կանոնադրությունը, ինչի պատճառով ՄՔԴ-ն իրավասություն չունի այս հարցում։
Բանաձևի նախագծում ասվում է, որ ռուսական զինված ուժերը «զանգվածային վայրագություններ են իրականացրել Ռուսաստանի Դաշնության կողմից օկուպացված Բուչա, Իրպեն, Խերսոն, Իզյում, Մարիուպոլ, Դնեպր և այլ ուկրաինական քաղաքներում, այդ թվում՝ բռնաբարություններ, արտադատական սպանություններ, անօրինական բռնություններ և սպառնալիքներ խաղաղ բնակչության դեմ»։
Բանաձևը վայրագությունների համար ուղղակիորեն մեղադրում է նախագահ Վլադիմիր Պուտինին և կոչ է անում Սպիտակ տանը բանաձև առաջարկել ՄԱԿ-ի Գլխավոր ասամբլեային՝ ամենաբարձր մակարդակով պատասխանատվություն ապահովելու համար:
