22.01.2026 | 17:27
Ջոկովիչը մտածում է «Մեծ սաղավարտի» 25-րդ տիտղոսի մասին․ «Հավատում եմ իմ ուժերին»
Խորհրդարանական պատվիրակությունը մասնակցել է Ուղղափառության ՄԽՎ-ի 25-րդ հոբելյանական նստաշրջանի աշխատանքներին
03.07.2018 | 13:56
Հունիսի 25-30-ը Հունաստանի մայրաքաղաք Աթենքում տեղի է ունեցել Ուղղափառության միջխորհրդարանական վեհաժողովի Գլխավոր վեհաժողովի 25-րդ հոբելյանական նստաշրջանը՝ «Խորհրդարանական ժողովրդավարություն եւ քրիստոնեական արժեքներ. Ուղղափառության միջխորհրդարանական վեհաժողովի 25 տարին» թեմայով: Վեհաժողովի աշխատանքներին մասնակցել է ՀՀ ԱԺ պատվիրակությունը, որի կազմում են եղել պատվիրակության ղեկավար Արտաշես Գեղամյանը եւ Վարդան Ղուկասյանը:
Ուղղափառության միջխորհրդարանական վեհաժողովի մասնակիցներին նախագահական պալատում ընդունել է Հունաստանի Հանրապետության նախագահ Պրոկոպիս Պավլոպուլոսը՝ ողջունելով նրանց եւ շնորհավորելով Ուղղափառության միջխորհրդարանական վեհաժողովի ստեղծման 25-ամյակի կապակցությամբ:
Վեհաժողովի բացման արարողությունն սկսվել է Հունաստանի նախագահ Պրոկոպիս Պավլոպուլոսի, Հունաստանի Հանրապետության խորհրդարանի նախագահ Նիկոլաոս Վուցիսի, Ռուսաստանի Պետական դումայի նախագահի տեղակալ Իրինա Յառովայայի եւ Աթենքի ու համայն Հունաստանի արքեպիսկոպոս Հիերոնիմոս II-ի ողջույնի խոսքերով:
ՀՀ ԱԺ պատվիրակության ղեկավար Արտաշես Գեղամյանն իր ելույթում փոխանցել է ՀՀ Ազգային ժողովի նախագահ Արա Բաբլոյանի շնորհավորական ուղերձը, որում մասնավորապես ասվում էր.
«Ուղղափառության միջխորհրդարանական վեհաժողովի հարգելի նախագահ,
հարգելի գլխավոր քարտուղար,
հարգելի հյուրեր,
տիկնայք եւ պարոնայք,
շնորհավորում եմ ձեզ Վեհաժողովի 25-ամյա տարելիցի կապակցությամբ:
Այս հոբելյանական տարում մենք կարող ենք վստահությամբ հայտարարել, որ Ուղղափառության միջխորհրդարանական վեհաժողովն իր քառորդդարյա պատմության ընթացքում հաջողությամբ կատարել է իր առջեւ դրված խնդիրները՝ ամրագրված Վեհաժողովի հիմնադիր փաստաթղթերում: Դժվար է չգնահատել Միջխորհրդարանական վեհաժողովի աշխատանքն ուղղված ժամանակակից աշխարհում ուղղափառ մշակույթի տեղի եւ դերի ամրապնդմանն ու զարգացմանը, միջկրոնական երկխոսության խորացմանը, ծայրահեղ ազգայնական դրսեւորումների եւ միջկրոնական տարաձայնությունների հաղթահարմանը:
Հատկապես կցանականայի ընդգծել ՈւՄՎ-ի դերը տարբեր երկրների խորհրդարանականների համար համագործակցության ինքնատիպ հարթակի ստեղծման գործում, որոնց միավորում են քրիստոնեական արժեքները, քրիստոնյաների իրավունքների եւ կրոնական ազատությունների պաշտպանության, խաղաղության առաջմղման քաղաքականության հարցերում ընդհանուր մոտեցումները:
Հարգելի ընկերներ, մաղթում եմ Ձեզ հաջող եւ արդյունավետ աշխատանք՝ ի նպաստ Ուղղափառության միջխորհրդարանական վեհաժողովի անդամ երկրների բոլոր ժողովուրդների»:
Արտաշես Գեղամյանն Ուղղափառության միջխորհրդարանական վեհաժողովի ստեղծման 25-ամյա հոբելյանի առիթով ՀՀ Ազգային ժողովի նախագահի անունից կազմակերպությանը հանձնել է ՀՀ Ազգային ժողովի պատվոգիր՝ միջխորհրդարանական կապերի ամրապնդման, մարդու իրավունքների եւ ազատությունների, ազգային եւ համամարդկային արժեքների պահպանության, ինչպես նաեւ հայանպաստ գործունեության համար:
Հունիսի 26-ին տեղի ունեցած նիստում ՀՀ ԱԺ պատվիրակության ղեկավար Արտաշես Գեղամյանը վեհաժողովի կողմից ընտրվել է կազմակերպության գործադիր մարմնի՝ Միջազգային քարտուղարության անդամ:
Նիստի ընթացքում Արտաշես Գեղամյանն իր ելույթում անդրադարձել է ներկա աշխարհաքաղաքական իրադրությանը, Հարավային Կովկասի տարածաշրջանում առկա լարվածությանը՝ բարձրացնելով Լեռնային Ղարաբաղի շուրջ օր-օրի աճող լարվածության հարցը՝ մեջբերելով Ադրբեջանի նախագահ Իլհամ Ալիեւի պատերազմի անթաքույց կոչ ներկայացնող ռազմատենչ հայտարությունները եւ կոչ անելով «կանխել տարածաշրջանում զարգացող պատերազմը, զսպել Ադրբեջանին եւ նրա թիկունքում կանգնած Թուրքիային»:
