Ուկրաինայում պատերազմը թուլացրել է ՌԴ-ի դիրքերը նախկին ԽՍՀՄ երկրներում

Ուկրաինա ռազմական ներխուժումը վատթարացրել է Ռուսաստանի դիրքերն ու նրա նկատմամբ վերաբերմունքը բոլոր հետխորհրդային երկրներում։ Նախկին ԽՍՀՄ պետությունների մեծ մասում, որը Կրեմլը համարում է իր շահերի և հատուկ ազդեցության գոտի, Ռուսաստանի ղեկավարության գործողությունների հավանությունը նվազել է ավելի քան տասը տոկոսով։ Այս մասին հայտնում է Re:Russia փորձագիտական ​​խումբը՝ վկայակոչելով Gallup ինստիտուտի անցկացրած հարցման արդյունքների տվյալները, փոխանցում է DW-ի ռուսական ծառայությունը։

Հարցման արդյունքներից երևում է, որ Ռուսաստանի վարկանիշն Ադրբեջանում նվազել է 2,6 անգամ։ Մոսկվայի գործողություններն այնտեղ հավանության են արժանացել հարցվածների միայն 23 տոկոսի կողմից։ Մյուս երկրներում՝ Հայաստանում, Ղազախստանում, Մոլդովայում ՌԴ գործողությունները հավանության չարժանացնողների թիվն առաջին անգամ գերազանցել է հավանողներինը։

Ռուսաստանի համախոհները դեռևս ավելի շատ են Ղրղզստանում և Ուզբեկստանում, բայց նույնիսկ այնտեղ Ռուսաստանի իշխանությունների գործողությունների հավանությունը նկատելիորեն նվազել է։

Ուկրաինայի դեմ պատերազմի հետևանքով Ռուսաստանի իշխանությունները կորցնում են նաև հարևան երկրներում ռուսական սփյուռքի համակրանքը։ Gallup-ի հարցումների 15 տարվա ընթացքում առաջին անգամ էթնիկ ռուսների մեծամասնությունը դժգոհություն է հայտնել Ռուսաստանի գործողությունների վերաբերյալ Էստոնիայում և Լատվիայում, իսկ Ղազախստանում կտրուկ աճել է բացասական վերաբերմունքը ՌԴ-ի նկատմամբ։

Միաժամանակ, Ուկրաինայում և Բալթյան երկրներում աճել է ԱՄՆ-ի հեղինակությունը։ Հարցման տվյալներից հետևում է, որ  այն հետխորհրդային երկրներում արդեն ավելի բարձր է, քան Ռուսաստանինը։

Էմմա Չոբանյան