15.01.2026 | 23:35
Ավարտվել է ՀՀ շախմատի առաջնությունների 3-րդ խաղափուլը․ Զավեն Անդրիասյանը միանձնյա առաջատար է
Սինան Օղանը պարզաբանել է՝ արդյո՞ք Ալիևը զանգահարել և միջնորդել է աջակցել Էրդողանին
Քաղաքականություն
26.05.2023 | 22:24
Թուրքիայի նախագահական ընտրությունների առաջին փուլում 5 տոկոս ձայն հավաքած Սինան Օղանը նախօրերին հարցազրույց է տվել TRT Haber-ին․ ուշագրավ է, որ Օղանին պետական հեռուստալիք են հրավիրել Ռեջեփ Թայիփ Էրդողանին աջակցելու մասին հայտարարությունից հետո։
Հարցազրույցում նա խոսել է նաև տարածվող տեղեկությունների մասին, որ Ադրբեջանի նախագահ Իլհամ Ալիևի հորդորով է աջակցություն հայտնել Էրդողանին։
«Իլհամ Ալիևն ինձ չի զանգահարել, ես հաղորդագրություն չեմ ստացել, մտքովս էլ չէր անցնի, որ Ալիևը նման փորձ կանի»,-ասել է Օղանը։
Նա նշել է, որ Թուրքիան չի կարող միջամտել Ադրբեջանի ներքին գործերին, իսկ Ադրբեջանը՝ Թուրքիայի ներքին գործերին։
Հավելենք, որ թուրքական լրատվամիջոցներն ավելի վաղ տեղեկություններ էին տարածել, որ Ադրբեջանի նախագահ Իլհամ Ալիևն օրերս զանգահարել է Թուրքիայի նախագահի թեկնածու Սինան Օղանին՝ միջնորդելով նախագահական ընտրությունների երկրորդ փուլում աջակցել Ռեջեփ Թայիփ Էրդողանին։
Սինան Օղանը ծնվել է Իգդիրում՝ ադրբեջանցիների ընտանիքում։ Նա սովորել է Մոսկվայի պետական համալսարանում, տիրապետում է ռուսերենին և անգլերենին, աշխատել է Թուրքիայի և Ադրբեջանի մի շարք համալսարաններում։ Օղանը կապեր ունի և՛ ՌԴ-ի, և՛ Ադրբեջանի հետ։ Նա նաև եղել է Թուրքիայի համագործակցության և համակարգման գործակալության (TIKA) ներկայացուցիչը Բաքվում, որտեղ նախագահ Իլհամ Ալիևի կողմից պարգևատրվել է պետական մեդալով։
Էմմա Չոբանյան
