Նիդեռլանդներում կալանք է դրվել Պուտինի նախկին փեսայի հողատարածքի վրա

Նիդեռլանդների դատախազությունը կալանք է դրել Ամստերդամի արվարձանում գտնվող հողատարածքի վրա, որը պատկանում է ՌԴ նախագահ Վլադիմիր Պուտինի ավագ դուստրը համարվող Մարիա Վորոնցովայի նախկին ամուսնուն՝ Յորիտ Ֆաասենին։ Այս մասին հաղորդել են «Պրոյեկտը», Follow the money-ի հոլանդական հրատարակությունը և բրիտանական The Guardian-ը, որոնց վկայակոչում է DW-ի ռուսական ծառայությունը։

Հետաքննության մեջ ասվում է, որ Պուտինի նախկին փեսային պատկանում է 1432 քառակուսի մետր տարածք Դույբենդրեխտ շրջանում։ Երկար ժամանակ տարածքը տնօրինել են Պուտինի ընկերներ Արկադի և Բորիս Ռոտենբերգներին պատկանող կառույցները, սակայն հետո Ֆաասենն այն գնել է 450,000 եվրոյով։ 2021 թվականին նա որոշել է այնտեղ կառուցել բնակելի շենք և վեց գրասենյակային տարածք։

Մայիսի 12-ին Նիդեռլանդների դատախազությունը կալանք է դրել հողատարածքի վրա՝ կապված ֆինանսական, տնտեսական և բնապահպանական իրավախախտումների հետ։ Փաստաբան Հելեն օվեր դե Լինդենը խոստովանել է, որ Ֆաասենը կարող է մեղադրյալ դառնալ քրեական գործով, սակայն, ըստ նրա, դա դեռ հնարավոր չէ ստույգ  հաստատել ներկայում առկա փաստաթղթերից։

Ֆաասենի ծանոթը «Պրոյեկտին» ասել է, որ Պուտինի նախկին փեսան վերջերս մեկնել է Ամստերդամ, բայց ստիպված է եղել վերադառնալ Ռուսաստան, իբրև, Նիդեռլանդների իրավապահ մարմինների կողմից իր նկատմամբ հետաքրքրության պատճառով: Նիդեռլանդների հատուկ ծառայության աղբյուրը հայտնել է, որ Ֆաասենին հարցաքննել են Ամստերդամ  ժամանելուն պես՝ պատժամիջոցներից խուսափելու համար։

Ֆաասենն ու Մարիա Վորոնցովան ամուսնացել են 2008 թվականին։ Ռուսական ԶԼՄ-ների տվյալներով՝ նրանք ունեն որդի՝ Ռոմանը, Պուտինի թոռներից միակը, որը հայտնվել է հանրության առաջ 2022 թվականին։ Պուտինի երկու ենթադրյալ դուստրերը՝ Եկատերինա Տիխոնովան և Մարիա Վորոնցովան, գտնվում են ԱՄՆ-ի ու ԵՄ-ի պատժամիջոցների տակ։

Էմմա Չոբանյան