ՀՀ-ի կողմից Ադրբեջանի տարածքային ամբողջականության ճանաչումից հետո խաղաղության պայմանագրի կետերի համաձայնեցումը շատ ավելի հեշտ կլինի․ Ալիև

Հայաստանի կողմից Ադրբեջանի տարածքային ամբողջականության ճանաչումից հետո խաղաղության պայմանագրի կետերի համաձայնեցման հարցը շատ ավելի հեշտ կլինի։ Նման վստահություն է հայտնել Ադրբեջանի նախագահ Իլհամ Ալիևի ՌԴ նախագահ Վլադիմիր Պուտինի հետ հանդիպման մեկնարկին, հայտնում է ՏԱՍՍ-ը։

«Կարծում եմ, որ Հայաստանի ղեկավարության վերջին հայտարարություններից հետո՝ Ղարաբաղը որպես Ադրբեջանի մաս ճանաչելու մասին, ինչպես նաև Ադրբեջանի տարածքային ամբողջականության ճանաչման՝ Ադրբեջանի Հանրապետության տարածքի համար կոնկրետ թվեր նշելով, խաղաղության պայմանագրի այլ կետերի շուրջ հարցերի համաձայնեցնելը շատ ավելի հեշտ կլինի»,- հայտարարել է Ալիևը։

Նա նաև իր երախտագիտությունն է հայտնել ՌԴ նախագահին միջնորդական ջանքերի համար։

«Ցանկանում եմ երախտագիտություն հայտնել Ադրբեջանի և Հայաստանի միջև հարաբերությունների կարգավորման հարցում ռուսական կողմի ջանքերի համար: Մենք բարձր ենք գնահատում այդ ջանքերը»,- ասել է Ալիևը։

Նա ընդգծել է, որ Ռուսաստանի նախագահի մասնակցությունը Մոսկվայում Ադրբեջանի և Հայաստանի ղեկավարների հետ եռակողմ հանդիպմանը վկայում է այն մասին, որ Ռուսաստանի Դաշնությունը մեծ նշանակություն է տալիս Բաքվի և Երևանի միջև խաղաղության համաձայնագրի ձեռքբերմանը։

Ալիևը նաև հայտարարել է, որ առաջընթաց է ակնկալում Ադրբեջանի և Հայաստանի միջև հարաբերությունների կարգավորման գործում՝ Մոսկվայում կայանալիք եռակողմ հանդիպման արդյունքներով։

«Հուսով եմ, որ այսօր մենք ևս մեկ քայլ կանենք եռակողմ ձևաչափով՝ երկու երկրների հարաբերությունների կարգավորման հարցում», – ասել է Ադրբեջանի ղեկավարը։

Տաթև Ֆռանգյան