25.11.2024 | 23:30
Էրդողանը ծրագրում է հաջորդ ժամկետով գրավել իշխանությունը․ TIME-ի անդրադարձը
Ալիևն ադրբեջանցի պատգամավորներին ուղարկել է Էրդողանի օգտին ձայներ հավաքելու․ Թուրքիայի ընդդիմության բողոքը
Քաղաքականություն
25.05.2023 | 23:01
Ադրբեջանի նախագահ Իլհամ Ալիևը շարունակում է միջամտել Թուրքիայում նախագահական ընտրությունների գործընթացին։ Մասնավորապես, գլխավոր ընդդիմադիր Ժողովրդահանրապետական կուսակցության անդամ, Անկարայից պատգամավոր Յըլդըրըմ Քայան հայտարարել է, որ ադրբեջանցի պատգամավորները գնացել են Իգդիր և քաղաքացիներին խնդրել ընտրությունների երկրորդ փուլում քվեարկել գործող նախագահ Թայիփ Էրդողանի օգտին, գրում են թուրքական լրատվամիջոցները։
«Աղրիից գնացել էի Իգդիր՝ նախագահական ընտրությունների 2-րդ փուլի համար։ Իգդիրի մեր քաղաքացիներից տեղեկացա, որ Ադրբեջանից և Նախիջևանից որոշ պատգամավորներ եկել են Իգդիր և միջամտել ընտրություններին՝ ձայներ խնդրելով Ռեջեփ Թայիփ Էրդողանի համար։ Մեր եղբայրությանը հարիր չէ խառնվել Թուրքիայի ներքին գործերին»,- ասել է Քայան։
Նա նշել է, որ ձայներ են ուզում հավաքել Ստամբուլում, Իզմիրում, որտեղ Էրդողանն առաջին փուլում քիչ ձայներ է ստացել։
«Ադրբեջանում մեր եղբայրները նույնպես պետք է հոգ տանեն իրենց քաղաքական գործիչների մասին, պետք չէ խառնվել Թուրքիայի ներքին գործերին։ 2018-ին Նիդեռլանդներում և Գերմանիայում ընտրություններում քաոս էիք անում, Էրդողա՛ն, ինչո՞ւ եք Նախիջևանից և Ադրբեջանից պատգամավորների բերում այստեղ և ձեզ համար ձայներ խնդրում»,- ասել է պատգամավորը՝ նշելով, որ մայիսի 28-ին Քեմալ Քըլըչդարօղլուն հաղթելու է։
Հավելենք, որ Թուրքիայում նախընտրական արշավի մեկնարկից ի վեր ադրբեջանական ամբողջ պետական քարոզչությունը, ինչպես նաև Թուրքիայում գործող Բաքվի կողմից ֆինանսավորվող լրատվամիջոցները լծված են Ռեջեփ Թայիփ Էրդողանի քարոզարշավին սատարելու գործին։ Այս արշավին միացել է նաև անձամբ Ադրբեջանի նախագահ Իլհամ Ալիևը, որն ապրիլի 29-ին մեկնել էր Անկարա և հայտնել ընտրություններում Էրդողանին իր աջակցության մասին։ Սրա հետևանքով թուրքական հասարակությունում մեծանում է դժգոհությունը, որ պաշտոնական Բաքուն խառնվում է Թուրքիայի ներքին գործերին։
Էմմա Չոբանյան
