15.12.2025 | 13:49
Ուիթկոֆը հայտարարել է Բեռլինում Զելենսկիի հետ բանակցություններում «նշանակալի առաջընթացի» մասին
ՔՊ-ականները պատասխանում են Արայիկ Հարությունյանին. Արցախը նրանց համար կարմիր գիծ չէ՞. ՏԵՍԱՆՅՈՒԹ
Քաղաքականություն
24.05.2023 | 21:10
Արցախն Ադրբեջանի կազմում ճանաչելու պատրաստակամության մասին Նիկոլ Փաշինյանի հայտարարությունից հետո, Արցախի նախագահ Արայիկ Հարությունյանի գնահատմամբ, Հայաստան-Ադրբեջան հարաբերությունների կարգավորման գործընթացում Հայաստանն իր դիրքերը շարունակաբար թուլացնելու ճանապարհով է գնում։
«Կան հստակ սկզբունքներ ու կարմիր գծեր, որոնց խախտումներն անընդունելի և անթույլատրելի ենք համարում: Եվ Արցախն Ադրբեջանի կազմում ճանաչելն այդ կարմիր գծերից է, որը, վստահ ենք, համայն հայության գերակշիռ մասի համար մնում է այդպիսին»,- հայտարարել է Հարությունյանը:
Նիկոլ Փաշինյանի թիմակիցներից մի քանիսն այսօր Ազգային ժողովում Factor TV-ի հարցերին ի պատասխան հայտարարեցին, որ ոչ միայն չեն կիսում Արայիկ Հարությունյանի դիրքորոշումը, այլև երկու ձեռքով պաշտպանում են Նիկոլ Փաշինյանի մոտեցումները։
Արայիկ Հարությունյանի կոչին, որ Արցախին առնչվող գործողություններում ու դիրքորոշումներում Հայաստանի Հանրապետության համար գլխավոր ուղենիշը պետք է լինի Արցախի ժողովրդի կամարտահայտությունը, իշխանական պատգամավոր Գուրգեն Արսենյանը պատասխանում է՝ ՀՀ իշխանությունների համար կարևոր է ՀՀ պետական շահը։
Ընդդիմադիր «Հայաստան» խմբակցության պատգամավոր Արթուր Խաչատրյանը Գուրգեն Արսենյանի այս հայտարարությունը խիստ մտահոգիչ է համարում՝ շեշտելով զրկանքները, որ արդեն հինգ ամիս է՝ կրում են արցախցիները։
Նիկոլ Փաշինյանի մեկ այլ թիմակից՝ ԱԺ փոխնախագահ Հակոբ Արշակյանն էլ հավաստիացնում է, թե քաղաքացիներն իրեն վստահեցնում են, որ Արցախն Ադրբեջանի կազմում ճանաչելու հարցում կանգնած են Նիկոլ Փաշինյանի կողքին։
Հակոբ Արշակյանն ասում է՝ թե ինչ կասեն կամ չեն ասի Արցախի իշխանություններից ինչ-որ մարդիկ, ՀՀ-ն վճռական է իր սուվերենությանն առնչվող հարցերում որոշումներ կայացնելիս։ Իշխանական պատգամավորը, միաժամանակ, նշում է՝ պայքարում են, որ խաղաղության պայմանագրում նաև արցախահայությանն առնչվող խնդիրները ներառեն։
Արցախահայության իրավունքներին ու անվտանգությանն է անդրադարձել նաև ԱՄՆ պետքարտուղարի Եվրոպայի և Եվրասիայի հարցերով օգնականի առաջին տեղակալը՝ նշելով, որ Վաշինգտոնը Երևանին ու Բաքվին առաջարկներն է ներկայացրել ամենավիճելի հարցերի լուծման վերաբերյալ։ Առաջարկներում, ըստ ամերիկյան կողմի, ներառված է նաև զորքերի հայելային հետքաշման հարցը։ Երևանն առայժմ չի մեկնաբանում վաշինգտոնյան առաջարկները։
Այս ֆոնին ՔՊ-ական Գևորգ Պապոյանը հայտարարում է՝ հայերը պետք է ընտրեն կա՛մ խաղաղությունը, կա՛մ պատերազմը՝ շեշտելով, որ պատերազմի դեպքում ծանր կորուստներ են սպասվում։
Նշենք, որ Նիկոլ Փաշինյանը դեռևս չի արձագանքել ո՛չ Արայիկ Հարությունյանի, ո՛չ էլ ավելի վաղ Արցախի խորհրդարանի պատգամավորի քննադատություններին, ըստ որոնց՝ անթույլատրելի է Արցախն Ադրբեջանի կազմում ճանաչելը, միայն կոչ է արել պատրաստակամ լինել Բաքվի հետ բանակցային գործընթացի հարցում։
Մանրամասները՝ տեսանյութում։
Նարեկ Կիրակոսյան
