14.08.2026 | 23:22
Հուլիսին Ուկրաինայում զոհվել է առնվազն 437 խաղաղ բնակիչ՝ ամենաբարձր ցուցանիշը 2022-ից ի վեր. ՄԱԿ
2022 թվականին փախստականների թիվը հասել է 100 միլիոնի․ ՄԱԿ
Քաղաքականություն
24.05.2023 | 22:18
2022 թվականին փախստականների թիվն աշխարհում հասել է 100 միլիոնի, ավելի քան 115 միլիոն մարդ բախվել է սուր սովի, հիմնականում պատերազմների և զինված հակամարտությունների պատճառով։ Նման տվյալներ է ներկայացրել ՄԱԿ-ի գլխավոր քարտուղար Անտոնիո Գուտերեշը Անվտանգության խորհրդի նիստում, որը նվիրված էր զինված հակամարտության գոտիներում խաղաղ բնակչության պաշտպանությանը, փոխանցում է Euronews-ը։
ՄԱԿ-ի ղեկավարն ընդգծել է, որ խաղաղ բնակչությանն օգնություն տրամադրող մարդասիրական կազմակերպությունները հաճախ բախվում են սպառնալիքների ու խոչընդոտների, որոնք խաթարում են նրանց աշխատանքը։
Նա հիշեցրել է, որ պատերազմներն ու հակամարտությունները հանգեցնում են առաջին անհրաժեշտության ապրանքների, այդ թվում՝ պարենի գների բարձրացման և սովի այն երկրներում, որտեղ ռազմական գործողություններ են տեղի ունենում, ինչպես նաև սննդի անվտանգության ոլորտում աշխարհի տարբեր տարածաշրջաններում խնդիրների։
Ռուսաստանի ներխուժումն Ուկրաինա հանգեցրել է սննդամթերքի, էներգիայի և պարարտանյութերի գների բարձրացմանն ամբողջ աշխարհում։
«Զինյալները ոչնչացնում են բերքը և գողանում անասունները, պայթուցիկները հեղեղել են բերրի հողերը, շուկաները չեն կարող գործել, գները կտրուկ աճել են: Ռուսաստանի ներխուժումն Ուկրաինա բարձրացրել է պարենի, էներգիայի և պարարտանյութի գներն ամբողջ աշխարհում՝ կործանարար հետևանքներով աշխարհի ամենաաղքատ մարդկանց համար»,- հիշեցրել է Գուտերեշը։
ՄԱԿ-ի Անվտանգության խորհուրդը կոչ է արել պաշտպանել խաղաղ բնակիչներին հակամարտության գոտիներում։
Տաթև Ֆռանգյան
