Նարեկացի, Կոմիտաս ունեցող ազգն այդ ի՞նչ է երգում հարսանիքներին. ապաքաղաքական զրույց Հովհաննես Չեքիջյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է Հայաստանի ազգային հերոս, ԽՍՀՄ ժողովրդական արտիստ Հովհաննես Չեքիջյանը: 76 տարի լինելով բեմի վրա՝ 95-ամյա երաժիշտը չի հոգնել դիրիժորությունից, որը համարում է իր կենսակերպը: Այդ տասամյակների ընթացքում Չեքիջյանը, իր խոսքով, միշտ կատարելագործվում էր և շարունակում է դա անել, որովհետև «լավը, կատարյալը միշտ հորիզոնի նման փախչում է»: Ամեն անգամ, երբ բեմ է դուրս գալիս, աշխատում է իր կատարումը համապատասխանեցնել համերգին ներկա ունկնդիրների տրամադրությանը և ընկալումներին:

Դիրիժորի համոզմամբ՝ կարևոր է ստեղծագործել ոչ միայն փորձերի ժանանակ, այլև հենց բեմում՝ ծանոթ ստեղծագործության մեջ գտնելով նոր երանգներ, նոր իմաստ:

«Եթե գործը նույնությամբ կրկնեմ, պիտի բեմը թողնեմ ու գնամ»,- ասում է նա:

Հաղորդման հյուրը խոստովանում է, որ երգչախմբի կատարյալ ներդաշնակության նա հասնում է միայն համերգի վերջում: Ընդհանրապես, երաժշտի դիտարկմամբ, այն, որ 100 հայ կարողանում է իրար լսել, իրար հետ սկսել և իրար հետ վերջացնել, արդեն իսկ կարևոր նվաճում է:

Անդրադառնալով «ռաբիսի», մուղամի՝ «բնիկ հայկական» լինելու խնդրին, ինչպես նաև Կոմիտասի՝ հայ մշակույթում կատարած դերին, Հովհաննես Չեքիջյանը նշում է, որ վերոհիշյալ ժանրերն առաջացել են օտար ազդեցությունների հետևանքով և պատիվ չեն բերում մեր ազգին: Մյուս կողմից, դիրիժորը կարծում է, որ ոչ բոլորն են Հայաստանում Կոմիտաս հասկանում, իսկ արտասահմանում նրա երաժշտությունը չափազանց պահանջված է:

Մանրամասները տեսանյութում:

Արամ Աբրահամյան