24.11.2024 | 12:19
Ռումինիայում նախագահական ընտրություններ են
Սիսիան համայնքի ավագանու «ՔՈ» խմբակցությունը հրաժարվում է մասնակցել նիստերին
Քաղաքականություն
21.05.2023 | 20:49
Սիսիան համայնքի ավագանու «Քաղաքացու որոշում» խմբակցությունը հրաժարվում է մասնակցել ավագանու նիստերին, քանի դեռ դրանք կազմակերպվում և անցկացվում են կանոնակարգի և օրենքների կոպիտ խախտումներով։ Այս մասին հայտարարություն է տարածել «ՔՈ» կուսակցությունը:
«Ավագանու նիստերում տիրող ոչ աշխատանքային մթնոլորտը, խմբակցության բարձրացրած հարցերի, խնդիրների նկատմամբ անառողջ և ոչ իրավաչափ մոտեցումը, ելույթների, երբեմն նաև հարցեր հնչեցնելու անհնարինությունն ուղղակիորեն հարվածում են ավագանու գործունեությանը, խոչընդոտում ավագանու անդամի՝ օրենքով սահմանված իրավունքների իրացումը։
Դա նշանակում է, որ անհնարին է դառնում նաև համայնքի, նրա բնակիչների շահերի պաշպանության առաքելության իրականացումն այն պարագայում, որ քաղաքական մեծամասնությունը որոշումներն ընդունում է օրենքի խախտումներով, կամայական, նիստը վարողի մեծամիտ ինքնավստահությամբ, նույն սկզբունքով են կազմակերպվում ու անցկացվում նաև հանձնաժողովների նիստերը։
Այս պարագայում ուղղակի անիմաստ է դառնում «ՔՈ» խմբակցության մասնակցությունը նիստերին։
Մենք չենք կարող մեր մասնակցությամբ խրախուսել համայնքի տապալմանը տանող գործելաոճը և անգործություն ցուցաբերել»,- նշվում է հայտարարությունում։
