ՀՀ-ն ԱՊՀ անդամ դառնալով ճանաչել է Ադրբեջանի տարածքը՝ Արցախն էլ մեջը․ Արթուր Հովհաննիսյան. ՏԵՍԱՆՅՈՒԹ

Հայաստանի Հանրապետությունը, ԱՊՀ անդամ դառնալով, ըստ էության, ճանաչել է Ադրբեջանի տարածքային ամբողջականությունը՝ Լեռնային Ղարաբաղն էլ մեջը։ Factor TV-ի հետ զրույցում նման պնդում է արել ԱԺ «Քաղաքացիական պայմանագիր» խմբակցության քարտուղար Արթուր Հովհանիսյանը՝ անդրադառնալով հարցին, թե արդյո՞ք Նիկոլ Փաշինյանը, ճանաչելով 86,6 հազար քառ․ կմ-ն որպես Ադրբեջանի տարածքային ամբողջականություն, ներառել է նաև Արցախի Հանրապետությունը։

«Հայաստանի Հանրապետությունը, ԱՊՀ անդամ դառնալով, ըստ էության, ճանաչել է Ադրբեջանի տարածքային ամբողջականությունը՝ Լեռնային Ղարաբաղն էլ մեջը։ Այսինքն՝ մենք նորից նույն բանն անելու կարիք չունենք»,- ներկայացրեց իշխանական պատգամավորը։

Հարցին՝ այդ դեպքում ինչո՞ւ է ՀՀ վարչապետը Բրյուսելում պարտավորություն ստանձնել նորից ճանաչել Ադրբեջանի տարածքային ամբողջականությունը, մեր զրուցակիցը պատասխանեց․

«Ասեմ, մենք այս հարցը երկու ուղղությամբ ենք տանում՝ միջազգային գործընկերների և մեր հանրության հետ։ Մեր հանրության մոտ էլ է այդ հարցն առաջանում, ասում են՝ ո՞նց մենք ԼՂ-ն ճանաչել ենք Ադրբեջանի կազմում։ Սա աղետ է, եթե կարող է նման հարց առաջանալ ՀՀ-ում ապրող կամ ԼՂ-ում ապրող մարդու մոտ, որովհետև այդ մարդուն ոչ ոք չի ասել՝ ընկեր, մենք վաղուց ենք ճանաչել։ Մենք հիմա հասել ենք մի փուլի, որ Ադրբեջանի հետ «հարաբերությունների կարագավորման» որոշակի փաստաթուղթ պետք է ստորագրենք, որն այն մասին է, որ էլ իրար վրա չենք կրակելու։ Դրա համար ենք մենք ստանձնում պարտավարություն, որ չունենք տարածքային պահանջներ»,- ասաց իշխանական պատգամավորը։

Մանրամասները՝ տեսանյութում։