16.05.2026 | 21:37
Փաշինյանը ներկայացրել է վարորդական իրավունքից զրկված անձանց խնդրի լուծման իր տարբերակը
Թուրքիայի ընդդիմությանը ծանր պայքար է սպասվում Էրդողանի հետ երկրորդ փուլում․ CNN
Քաղաքականություն
17.05.2023 | 23:30
Ամերիկյան CNN հեռուստաընկերությունն անդրադարձել է Թուրքիայում ընտրությունների գիշերը տիրող ու հետընտրական իրավիճակին։ Մասնավորապես, Թուրքիայի նախագահ Ռեջեփ Թայիփ Էրդողանի իշխող «Արդարություն և զարգացում» կուսակցության Ստամբուլի շտաբի մոտ հավաքված ամբոխի շարքերում լռություն է տիրել, քանի որ նախագահի ձայներն իջել են 50 տոկոսից, որն անհրաժեշտ էր հաղթանակի համար։
«Մենք սովոր չենք սրան։ Մենք սովոր ենք հաղթել առաջին փուլում»,- ասել է Էրդողանի 38-ամյա կողմնակից Ումրան Օզդեմիրը:
«Մեր տրամադրությունները կարող են փոխվել, բայց Էրդողանի իշխանությունը չի փոխվի»,- ասել է 53-ամյա Իսմայիլ Բոյաջին։
Էրդողանն իր հերթին ընտրությունները անվանել է «ժողովրդավարության տոն»։
Լրատվամիջոցը գրում է, որ վեց կուսակցություններից բաղկացած կոալիցիան միավորվել էր Էրդողանի 20-ամյա կառավարմանը վերջ տալու համար՝ քարոզարշավ իրականացնելով փոփոխությունների հարթակի վրա՝ վերականգնելու ժողովրդավարական ինստիտուտները։ Թուրքական հարցումների մեծամասնության արդյունքները կանխատեսում էին, որ հիմնական ընդդիմադիր թեկնածու Քեմալ Քըլըչդարօղլուն առավելություն կունենա։ Ի վերջո, եղավ հակառակը. Էրդողանը հինգ միավորի առավելություն ապահովեց իր հիմնական մրցակցի նկատմամբ, ինչը նրանց հանգեցրեց երկրորդ փուլի քվեարկության: Երրորդ թեկնածուն՝ ծայրահեղ աջ քաղաքական գործիչ Սինան Օղանը, ստացել է պոտենցիալ որոշիչ ձայների 5 տոկոսը։
Նոր որոշիչ խաղացողն իր հավանությունը որևէ թեկնածուի նկատմամբ պայմանավորել է փախստականների և որոշ քրդական խմբերի նկատմամբ վերաբերմունքով։
«Երբ մենք որոշում ունենանք, իհարկել, կառաջարկենք երկու կողմերին։ Կարող է լինել Քըլըչդարօղլուն, կարող է լինել Էրդողանը։ Մենք դեռ հստակ որոշում չունենք»,- ասել է Օղանը CNN-ի հետ զրույցում։
Սակայն վերլուծաբանները կանխատեսում են, որ Օղանի ծայրահեղ ազգայնական հետևորդները, ամենայն հավանականությամբ, հաջորդ փուլում կքվեարկեն Էրդողանի օգտին:
Ընդդիմությունը դժվարին պայքարի առաջ է կանգնած։ Ի թիվս այլ բաների՝ ընտրությունների արդյունքները բացահայտեցին ընդդիմության սահմանափակ կարողությունը՝ օգտվելու տնտեսական ճգնաժամից և երկրի հարավ-արևելքում ավերիչ երկրաշարժից տուժած բնակչության դժգոհությունից: Ընդդիմադիր ընտրողները, որոնց հետ CNN-ը զրուցել է նախքան ընտրատեղամասերի փակվելը, լավատես են թվացել։ Նրանք ասել են, որ քվեարկում են հանուն «արդարության և ազատության», վերականգնված տնտեսության և հակակշիռների ու զսպումների համար:
Այնուամենայնիվ, նույնիսկ այն դեպքում, երբ ընտրողները փոփոխությունների կոչ են անում, այստեղ կան համոզմունքներ, որոնք անփոփոխ են թվում: Ավելի վաղ, երբ CNN-ը հաղորդում էր երկրի երկրաշարժի գոտում գտնվող Էրդողանի հենակետերից, պարզվել է, որ նախագահին աջակցությունը մնում է ամուր։ Այն հաստատվել է նաև ընտրությունների արդյունքներով։
Էմմա Չոբանյան
