23.02.2026 | 23:30
Ադրբեջանը նույնպես հետաքրքրություն է հայտնել Եվրոպական խաղաղության գործիքակազմի շրջանակներում օգնություն ստանալու հարցում
Պուտինն Իրանի և Ադրբեջանի հետ երկաթուղային ենթակառուցվածքների և բեռնափոխադրումների վերաբերյալ համաձայնագրի պատրաստման շուտափույթ ավարտի հույս է հայտնել
Քաղաքականություն
17.05.2023 | 20:51
Ռուսաստանն ակնկալում է ՌԴ-ի, Իրանի և Ադրբեջանի միջև երկաթուղային ենթակառուցվածքների և բեռնափոխադրումների զարգացման ոլորտում համագործակցության մասին համաձայնագրի նախապատրաստման շուտափույթ ավարտ։ Այս մասին հայտարարել է ՌԴ նախագահ Վլադիմիր Պուտինը Իրանի նախագահ Էբրահիմ Ռաիսիի հետ տեսակապով Ռեշտ-Աստարա երկաթուղային գծի կառուցման համաձայնագրի ստորագրման արարողությանը, գրում է ՌԻԱ Նովոստին։
«Այդ միջանցքի ստեղծման համատեքստում, որի մասին մենք այսօր խոսում ենք, փոխգործակցությունն իրականացվում է Ադրբեջանի հետ սերտ գործընկերությամբ։ Եվ մենք ակնկալում ենք եռակողմ ձևաչափով, ադրբեջանական կողմի մասնակցությամբ, համաձայնագրի նախապատրաստման շուտափույթ ավարտ՝ «Հյուսիս-Հարավ» ճանապարհով երկաթուղային ենթակառուցվածքի և բեռնափոխադրումների զարգացման ոլորտում համագործակցության համար»,- ասել է Պուտինը։
Նա նշել է, որ դա անհրաժեշտ իրավական բազայի հիմք կձևավորի՝ երեք երկրների հաջող համագործակցության համար։
Հավելենք, որ Ուկրաինայում պատերազմի մեկնարկից ի վեր ՌԴ-ն մեծ ջանքեր է գործադրում երկաթգծի կառուցումը կյանքի կոչելու համար։ Ադրբեջանը, ՌԴ-ն ու Իրանն ակտիվ բանակցություններ էին վարում, սակայն վերջին ամիսներին Թեհրանի և Բաքվի հարաբերություններում լուրջ լարվածության ֆոնին դեռևս պարզ չէ, թե նախագիծն ինչ ընթացք կունենա։
Էմմա Չոբանյան
