07.10.2026 | 23:48
Արթուր Դանիելյանը կալանավորվեց
Amnesty International-ը ՌԴ-ին կոչ է արել ապահովել Նավալնիի կյանքի և առողջության պաշտպանությունը
Քաղաքականություն
11.05.2023 | 23:15
Amnesty International (AI) միջազգային իրավապաշտպան կազմակերպությունը կոչ է արել Ռուսաստանի իշխանություններին՝ ապահովել ռուս ընդդիմադիր գործիչ Ալեքսեյ Նավալնիի կյանքի և առողջության պաշտպանությունը, որը ինը տարվա պատիժ է կրում Վլադիմիրի մարզում խիստ ռեժիմի գաղութում՝ «քաղաքական դրդապատճառներով անարդար դատավարության արդյունքում կայացված դատավճիռով»։
«Նրա առողջական վիճակը ծայրահեղ մտահոգիչ է, և քրեակատարողական գաղութի վարչակազմի կողմից շարունակվող հալածանքներն ու դաժան վերաբերմունքը խախտում են նրա իրավունքները և հակասում են Ռուսաստանի միջազգային պարտավորություններին»,- ընդգծել են իրավապաշտպանները մայիսի 11-ին հրապարակված հայտարարության մեջ:
Կազմակերպությունը հիշեցրել է, որ գաղութի վարչակազմը քաղաքական գործչին մշտապես և կամայականորեն տեղափոխում է պատժախուց։
«Ինչ վերաբերում է Ալեքսեյ Նավալնիին, ապա իշխանություններն օգտագործում են միջոցների ամբողջ հսկայական զինանոցը, որպեսզի նրա կեցությունը գաղութում բացարձակ անտանելի դարձնեն։ Վատ վերաբերմունքը, վերջերս նրա նկատմամբ ուժի կիրառումը և անհրաժեշտ բժշկական օգնություն տրամադրելուց հրաժարվելը Նավալնիի իրավունքների և Ռուսաստանի միջազգային պարտավորությունների կոպտագույն խախտումներ են։ Միայն դա արդեն կարելի է համարել որպես խոշտանգում կամ վատ վերաբերմունք»,- ասել է AI-ի ՌԴ-ի մասով հետազոտող Օլեգ Կոզլովսկին։
Իրավապաշտպանները կարծում են, որ Ռուսաստանի իշխանությունները պետք է «անհապաղ և անվերապահորեն» ազատ արձակեն Նավալնիին, քանի որ նա դատապարտվել է ոչ թե հանցավոր գործունեության, այլ «իր իրավունքներն իրացնելու խաղաղ փորձերի» պատճառով և խղճի բանտարկյալ է հանդիսանում։
