ԵՄ-ն Վրաստանին կոչ է անում Ռուսաստանից «անվստահելի ինքնաթիռները» չթողնել երկիր

Բրյուսելն այսօր Թբիլիսիին կոչ է արել «անվստահելի ռուսական ինքնաթիռներ» չթողնել իր տարածք։ Ըստ Եվրամիության արտաքին քաղաքականության ծառայության խոսնակ Պիտեր Ստանոյի՝ Արևմուտքի պատժամիջոցների պատճառով Ռուսաստանը չի կարողանում արդիականացնել իր ավիապարկի 95 տոկոսը, որն անհրաժեշտ է անվտանգության միջազգային չափանիշներին համապատասխանելու համար, փոխանցում է DW-ի ռուսական ծառայությունը։

Եվրամիությունը կոչ է անում Վրաստանին՝ որպես անդամ դառնալու ձգտող երկրի, միանալ Ռուսաստանի Դաշնության դեմ գործող պատժամիջոցներին, այդ թվում՝ ավիացիայի ոլորտում, և վերահսկել դրանք շրջանցելու փորձերը։ ԵՄ-ն թույլ չի տալիս թռիչքներ իրականացնել դեպի Ռուսաստան կամ այդ երկրի վրայով՝ որպես Ուկրաինա ներխուժմանը պատասխան պատժիչ միջոցառումների մաս:

Ինչ վերաբերում է Ռուսաստանի Դաշնություն մուտքի վիզաների վերացմանը, ապա միայն Վրաստանի քաղաքացիներն իրավունք ունեն որոշել՝ օգտվե՞լ այդ առաջարկից, թե՞ ոչ, նշել է Ստանոն։

Նախօրեին ՌԴ նախագահ Վլադիմիր Պուտինը հրամանագրեր է ստորագրել մայիսի 15-ից Վրաստանի քաղաքացիների համար վիզային ռեժիմը, ինչպես նաև Ռուսաստանի Դաշնությունից Վրաստան ավիափոխադրումների արգելքը վերացնելու մասին, որը գործում էր 2019 թվականից։ Վրաստանի քաղաքացիները, համաձայն այս հրամանագրի, կարող են մուտք գործել Ռուսաստան՝ պարզապես ցույց տալով իրենց անձնագիրը, եթե պատրաստվում են երկրում մնալ 90 օրից պակաս և մտադիր չեն սովորել կամ աշխատել։

Տաթև Ֆռանգյան