25.07.2026 | 19:46
Համբուրգ․ Էլինա Ավանեսյանը պարտվեց կիսաեզրափակիչում. ՏԵՍԱՆՅՈՒԹ
Ֆրանսիան և Իտալիան վիճում են ներգաղթյալների պատճառով․ Իտալիայի ԱԳ նախարարը չեղարկել է Փարիզ այցը
Քաղաքականություն
05.05.2023 | 21:57
Իտալիայի արտաքին գործերի նախարար Անտոնիո Տայանին չեղարկել է Փարիզ այցն այն բանից հետո, երբ Ֆրանսիայի ՆԳ նախարարը հրապարակայնորեն քննադատել է վարչապետ Ջորջիա Մելոնիին՝ նրան համեմատելով ֆրանսիական ծայրահեղ աջ առաջնորդ Մարին Լը Պենի հետ: Տայանին այս մեկնաբանություններն «անընդունելի» է անվանել և ի նշան բողոքի՝ չեղարկել է իր ծրագրած ուղևորությունը Ֆրանսիա, գրում է Euronews-ը։
RMC ռադիոկայանին տված հարցազրույցում Ջերալդ Դարմանինն ասել է, որ Մելոնին «չի կարողացել լուծել միգրացիոն խնդիրները, որոնց պատճառով ընտրվել է անցյալ տարի»՝ Իտալիայի վարչապետին մեղադրելով ընտրողներին «ստելու» համար, երբ վստահեցնում էր, որ կարող է վերջ դնել ներգաղթյալների թվի աճով պայմանավորված ճգնաժամին։
«Տիկին Մելոնին նման է տիկին Լը Պենին, այսինքն՝ նրան ընտրում են կոնկրետ խոստումների համար, իսկ հետո տեսնում ենք, որ դա չի դադարում, այլ ամեն բան միայն ավելի վատ է դառնում»,- ասել է Դարմանինը։
Այս մեկնաբանությունները հնչել են այն վեճի ժամանակ, թե որտեղ պետք է թույլ տան ապօրինի ներգաղյալներին ափ դուրս գալ, եթե նրանց բռնեն Հյուսիսային Աֆրիկայից Եվրոպա շարժվելիս։
Նշենք, որ Իտալիան պայքարում է ներգաղթյալների կտրուկ աճի դեմ։ Տարեսկզբից Թունիսից և Լիբիայից ծովով ավելի քան 42,000 ներգաղթյալ է ժամանել, ինչը 4 անգամ ավելին է անցած տարվա համեմատ։
Տաթև Ֆռանգյան
