ՄԱԿ-ը կոչ է արել դադարեցնել լրագրողների դեմ հարձակումներն ամբողջ աշխարհում

ՄԱԿ-ի գլխավոր քարտուղար Անտոնիո Գուտերեշը հիշեցրել է ԶԼՄ-ների ազատության կարևորությունը՝ որպես ժողովրդավարության և արդարության հիմնական սկզբունք։

«Ազատ լրագրությունը մեզ բոլորիս տալիս է այն փաստերը, որոնք մեզ անհրաժեշտ են՝ կարծիքներ ձևավորելու և աշխարհի ուժեղներին ճշմարտությունն ասելու համար»,- ասել է նա Մամուլի ազատության համաշխարհային օրը, փոխանցում է DW-ի ռուսական ծառայությունը:

Մամուլի ազատությունն այսօր հարձակման է ենթարկվում ամբողջ աշխարհում, ասել է Գուտերեշը, իսկ ապատեղեկատվությունն ու ատելության խոսքը մաքրում են սահմանները փաստերի և հորինվածքների, գիտական տվյալների և դավադրության տեսությունների միջև:

Նրա խոսքով՝ 2022 թվականին առնվազն 67 լրատվամիջոցի աշխատակից է սպանվել, ինչը 50 տոկոսով ավելին է, քան մեկ տարի առաջ։ Լրագրողները թիրախային հարձակումների զոհ են դարձել՝ փորձելով կատարել իրենց մասնագիտական պարտականությունները, ասել է Գուտերեշը։

Բացի այդ, կին լրագրողների գրեթե երեք քառորդը ենթարկվել է առցանց բռնության, իսկ յուրաքանչյուր չորրորդը՝ ֆիզիկական սպառնալիքների:

«Դադարեցրեք սպառնալիքներն ու հարձակումները։ Դադարեցրեք ձերբակալել և բանտ նստեցնել լրագրողներին իրենց աշխատանքը կատարելու համար։ Կանգնեցրեք սուտն ու ապատեղեկատվությունը»,- կոչ է արել ՄԱԿ-ի գլխավոր քարտուղարը։

Մամուլի ազատության համաշխարհային օրը՝ մայիսի 3-ը, հռչակվել է ՄԱԿ-ի Գլխավոր վեհաժողովի կողմից 1993 թվականի դեկտեմբերին, ՅՈՒՆԵՍԿՕ-ի առաջարկով։ Այսպիսով, այս տարի այն նշվում է 30-րդ անգամ։

Տաթև Ֆռանգյան